11.15.2014

Maysa nga Ilokano ni “The Singing Policeman,” ‘Bagis

NABUYAM, kabagis, ni “The Singing Policeman” wenno ‘tay “Mamang Pulis” a nag-viral (wenno nagwaras iti social media) ti video-na nga agkankanta iti “Pusong Pulis” iti ayug ti “Pusong Bato”? A naglamiis ti timekna bayat ti panangyallayna iti “All of Me” ni John Legend?

Maysa gayam nga Ilokano, ‘bagis.

Isuna ni PO1 Robert Basan Abella Jr., tubo iti Marcos, Ilocos Norte. Nakadestino iti Camp Florendo iti San Fernando City, La Union.

*     *     *

Kinapudnona, ‘bagis, sakbay a naam-ammo a Mamang Pulis wenno The Singing Policeman, nalataken ni Jhae-are, awag kenkuana dagiti kasingedna, a singer.

Sakbay a nagpolis, kameng ti grupo a Bukros Singers, ken announcer iti DZJC.

Isu ti nangpalatak kadagiti orihinal a kanta nga “Agbabaket” ken “Pungan,” dua kadagiti agarup 50 a kanta a nairekordna. Addaan metten iti lima nga album— adda solona ken various artists.

Kinapudnona, ‘bagis, ti malagipko a naganna ket Robert “Agbabaket” Abella.

He-he-he.

*     *     *

Nupay inkakaubingan ni Jhae-are a dinengdengngeg nga agkanta dagiti dadakkelna nga agpada a nalaing a kumanta, ken agkantakanta met no kua, sa la naduktalan ti talentona idi addan iti hayskul.

Iti maysa a rehional a salip idiay Pangasinan, nagparikut ti pannakabagi ti Ilocos Norte— napukaw ti timekna. Ne, ta insukatda ni Jhae-are.

Ket pudno ‘ta pugtom, ‘bagis, ni Jhae-are ti nag-1st Place.

Dita a naamirisna a napintas met ti timekna ket inakonan iti bagina a maysa isuna a singer.

*     *     *

Kas “singing policeman,” kameng isuna ti banda dagiti polis, ti Regional Public Safety Battalion 1 Band weno RPSB1Band.

Malaksid nga agtokarda kadagiti pasken dagiti polis, maaw-awisda met kadagiti sabsabali a pasken.
Siempre, basta aprobaran ti hepeda.

*     *     *

Naengganio nga ag-cover kadagiti agduduma a kanta ket ipaskilna iti YouTube, ta kunana, kayatna a maipakita iti sangalubongan ti positibo met nga aspekto ti biag dagiti polis.

Kasta met nga ag-cover kadagiti kankanta nga Ilokano, saan laeng kadagiti bukodna a kanta, tapno maipangngegna met iti sangalubongan ti talento ken samiweng dagiti Ilokano.

*     *     *

Nakaay-ayat, ‘bagis, ta positibo dagiti komento kadagiti kanta ni Jhae-are wenno Manong Polis kunata man laengen ta Ilokano la ngarud, a nagwarasen iti social media.

Malaksid a nai-feature kadagiti broadsheet, nairakurak metten iti telebision daytoy Ilokano a polis a naidumduma ti laingna nga agkanta.

Maipagpannakkeldaka, Manong Polis.—O

(Naipablaak iti Bannawag, Nobiembre 24, 2014 a bilang. Iti sabali a bangir, mabuya ni Kabagis Eloy kas host iti “Tsismax, Showbiz Tsismis To The Max” iti Global News Network Cable Channel tunggal Biernes, alas sais iti sardam, ken adda replay-na iti Sabado iti alas nuebe  iti agsapa. Mabuya pay daytoy iti gnntv-asia.com. Iti sabali a bangir, tunggal Sabado, iti alas nuebe agingga iti alas onse iti bigat, maang-angay iti Tiara Oriental Hotel, Makati City ti “Celebrity Hour”, panagtitipon dagiti celebrity iti agduduma a tay-ak a koberan ti media. No interesado nga ag-guest, ag-text wenno umawag iti 0932-242-7787.—AST)

7.11.2013

Agkonsierto iti Hong Kong da “The Singing Teacher” ken “The Voice of an Angel”

Ti akkub ti album a “Mailiwak Kenka, Sweetypie”
da Alexander Barut ken Noraline Domingo.


DI PAY NALUTO, NAIBUSEN
Kolum ni ANGELO 'ELOY' PADUA
Bannawag, Hulio 22, 2013


KADAGITAY kakabagis iti Hong Kong, markaanyon dayta Hulio 28 kadagita kalendarioyo.
Apay?

Agkonsierto da Alexander “The Singing Teacher” Barut ken Noraline “The Voice of an Angel” Domingo.

Ne, amangan no mailaw-ankayo. Maangay daytoy iti Bayanihan Centre, Kennedy Town, Hong Kong iti alas dos iti malem.

*     *     *

Sigurado a mapnekkayo iti idadar-ayyo ta kantaenda dagiti kanta a naipalaon iti baro nga albumda, ti “Mailiwak Kenka, Sweetypie” a nayalnag laeng itay nabiit.

Ala, ket mangngeganyonto dagiti kanta a pinutar da Vhen Bautista, Rudy Rumbaoa, Isaganie Bermosa, Noraline Domingo, Jerameel Perucho, Rogelio Lopez, Bonnie Manuel, Benny Ventura ken Ariel S. Tabag.
Ket mananamyo dagiti liriko dagiti mannurat nga Ilokano a kas kada Roy V. Aragon. Derick Marcel F. Yabes, Rolando A. Seguro, Jr., Dexter M. Fabito, Isaganie Bermosa, Benny Ventura, Bonnie Manuel, Imelda Toledo, Imelda Alibuyog, Rudy Rumbaoa, Ed Britos, Francis Soriano, Fr. De Guzman, Ferdinand Cortez, Vhen Bautista ken Alexander Barut.

Daytoy ‘tay kunada, ‘bagis, nga adda la ngaruden bonusna, adda pay konsolasionna.

Agasem that?

*     *     *

Sakbayna, ‘bagis, no koma padaya ti konsierto iti Hong Kong. adda pay “pagpapaimas” nga idasar ni ‘Bagis Alexander.

Agkonsierto iti daytoy Hulio 20 iti Sanchez Mira People’s Gymnasium iti alas dos agingga iti alas singko iti malem.

Sigurado a kantaenna dagiti superhit a kantana a kas iti “For Adults Only,” “Apay,” “Saniata” ken dadduma pay.

*     *     *

Bassit ngem nasagitsit, kunada man ken ni ‘Bagis Alexander, ‘bagis. Wen, a, ta dua a tawenna pay laeng iti industria ti Musika Ilokana, mapanen a tallo ti album-na.

Immuna daytoy “For Adults Only.”

Maikadua daytoy “Mailiwak Kenka, Sweetypie.”

Sa manamnama met ti album-da ken Ronald Domingo, ti kumakanta a nakabase iti Ilocos Norte.

*     *     *

Ginasut metten a kankanta ti nairekord ni ‘Bagis Noraline, ‘bagis.

Dati a kameng ti nalatak a Bukros Singers.

Isu ti nangpalatak kadagiti kanta nga “Iliwko Kenka,” “Asiak Pay,” “Nupay Lagip Laeng,” “Agsublika Kaniak,” ken dadduma pay.

Nakabase ita iti Hong Kong. Isu ti gapuna a “Mailiwak Kenka, Sweetypie” ti paulo ti albumda ken ‘Bagis Alexander.

Wen, a, ta nakabase met iti Texas ni ‘Bagis Alexander.

*     *     *

Iti panangdengdengngegko, ‘bagis, iti “Mailiwak Kenka, Biagko” a carrier single ti nasao nga album, diakto masdaaw no agbalin a “pambansang awit” dagiti Ilokano nga OFW ti nasao a kanta.

Wen, a, ta naiparikna la unay da ‘Bagis Alexander ken ‘Bagis Noraline ti pannakaila iti patpatgen ti biag a naynay a marikrikna dagiti kakabsat nga OFW.

No kayatmo a mapaneknekan, ‘bagis, mapanmonto denggen a personal inton Hulio 28 iti Bayanihan Centre.—O

(Para kadagiti interesado nga agbuya kadagiti nasao a konsierto ken maaddan iti album a “Mailiwak Kenka, Sweetypie,” para iti Sanchez Mira, kontaken ni Napoleon Malto iti Municipal Office of Senior Citizens Affair ken mabalin met a maaddaankayon iti kopia iti mismo a venue iti kaaldawan ti konsierto. Idinto nga iti Hong Kong, kontaken iti selpon  ni Noraline Domingo iti numero +85291769714, wenno ag-PM iti facebook.com/noraline.domingo.—AST)

2.14.2013

Ania ti “Pambansang Awit” Dagiti Ubbing nga Ilokano, ‘Bagis?


AMMOM kadi, bagis, a kalpasan ti panaglatak dagiti kanta a “Saniata” ken “Apay” manipud iti album a For Adults Only, adda manen baro a “pambansang awit” dagiti Ilokano a kanta ni Alexander “The Singing Teacher” Barut?

Karaman met laeng iti nasao nga album, daytoy “For Adults Only” nga ad-adda ammo itan a “Bassit a Lalaki” (maysa a prase iti nasao a kanta) ti most requested song iti Kailokuan. Isu payen ti mangmangeg a maipatpatokar kadagiti parapasahero a jeep. Saan la kano laengen a para adults ta nagbalin metten a “pambansang awit” dagitay ubbing, ta uray uneg ti klase ket kankantaenda.

Agasem dayta, ‘bagis?

*     *    *

Ad-adda met a daytoy ti kantaen dagiti makisalip, ken dagiti guest singers, iti “Alex Barut Sing-Alike Singing Contest” a segment iti “Baro a Rimat” a programa ni Ronald Domingo iti DZRL iti kada Domingo.

Most requested met daytoy iti “DWRS Bangon Kabarangayan” ni Edwin Ermitanio.

Uray iti “Johnny Tango Program” ni Sonny Dancel, nalatak daytoy “For Adults Only.”

Agdindinamag met, ‘bagis, a nalatak dagiti kanta a nairaman iti For Adults Only album iti DZNL-La Union. Kasta met idiay Bombo Radyo-Tuguegarao.

Manamnama met a mangngeganen dagiti kankanta ni Alexander iti program a “Pinakbet” iti DZNF Ilocos Sur.

*     *    *

Idiay Hawaii, sumangkalatak met, ‘bagis, dagiti kanta ni Alexander.

Agtultuloy a maipatpatokar iti programa ni Jay Oallesma iti KPHI.

Ken uray iti “Lovingly Yours, Ate Vi” ni Venus Viloria ken “Edna's Afternoon Delight” ni Edna Butay iti KNDI.

Kasta met a maipatpatokar dagiti kanta ni Alexander iti “Linglingay iti Sardam” ni Rey “Boboy” Patao iti KNUI-Maui. Maysa a mataiguray a paset daytoy a programa ket ti panagibasa ni Alexander kadagiti daniw nga Ilokano a pakaragsakan la unay ni Apo Rey a host ti nasao a programa gapu iti sumangkalamiis met a timek ni Alexander a dumaniw.

*     *    *

Ti nakaay-ayat pay, ‘bagis, kadagiti kumakanta nga Ilokano, agtitinnag-ay wenno agtitinnarabayda.

Kas iti daytoy mini-concert kadagiti estasion ti radio ni Vhen “Prince of Ilocano Song” Bautista. Karaman kadagiti mairaprapin a kanta dagiti kanta ni Alexander.

Mangngegan gayam, ‘bagis, dagiti mini-concert ni Vhen iti “Kiddaw ken Sagut” a programa ni Ruben Ballesteros iti DZNL-La Union; “Rimat Dagiti Bituen” ni Freddie Boy Tan iti DWRS-Vigan; “Edna's Afternoon Delight ni Edna Butay iti KNDI-Honolulu; “Linglingay iti Sardam” ni Rey Boboy Patao iti KNUI-Maui; ken “Pinakbet” iti DZNF-Ilocos Sur.

*     *    *

Ti nakaay-ayat ken ni Alexander, ‘bagis, fans-na uray dagiti estudiantena iti hayskul idiay Texas.

Sumangkarengrengda iti panagkantana. Ken adda metten kopiada iti albumna.

Ken karamandan kadagiti Ilokano fans ni Alexander a mangpadpadaan iti maikadua nga albumna, a pagkaduaanda ken ni Noraline Domingo, a manamnama a mairuar iti katengngaan daytoy a tawen.—O


(Naipablaak iti Bannawag, Pebrero 25, 2013 a bilang iti kolum ni Angelo Padua a "Di Pay Naluto, Naibusen.")

2.03.2013

Lovingly Yours, Marie


“ISEM, isem, umisemka man, biagko/ Ta isemmo isu’t mangay-ayo/ Daytoy pusok a napnuan ‘ti limdo.”

Ne, kitaem ket kimmantaka, ‘bagis. Di ketdin ta nakalatlatak dayta a kanta? Mapanka iti uray ania nga okasion iti Kailokanuan, kasar, buniag, piesta, adda ta adda “Isem” a mangngegam.

Ta malaksid a nagmayat a lung-ayan ken pudno a makaisem ti liriko ti kanta, makaawis ti timek ni Marie Prieto nga akinkanta iti daytoy.

Ngem ammom kadi, ‘bagis, a sumagmamanon a tawen nga adda sadiay Taiwan ni Marie?

Natalinaay nga agbibiag kaduana ti Taiwanese a lakayna ken tallo a bungada.

*     *     *

Ngem kas pudpudno a managayat iti musika, dina maliklikan ti awis daytoy.

Agingga a dimmatag manen (ti musika) babaen ken ni Vhen Bautista, ti Prince of Ilocano Song.

Babaen ti Facebook, nagkinnomusta dagitoy agpagayam. Agingga a napagnumuanda ti mangbukel iti maysa nga album.

Suraten ni Marie dagiti liriko, ikkan ni Vhen iti melodiana

Agingga a naipasngay ti “Lovingly Yours, Marie,” ti back-to-back album da Marie ken Vhen.

*     *     *

Buklen ti nasao nga album ti sangapulo ket maysa nga orihinal a kanta kas kadagiti sumaganad:

“Yawatko Kenka,” “Wo Ai Ni,” “No Ammom La Koma,” “No Bilang Ta Sikanto ‘Tay Agriro,” “Ammok a Biddut,” “Kupido, ‘Toy Pusok Na-Bull’s Eye-mo,” “Gumawgawawa Iti Panagsublim,” “Mamatika Kenkuana,” “Sika,” “Video Call,” “Maikadua nga Ayat,” “Marie,” “Musika, Sapsapulenka Latta,” “Iliwko Nalaus Unay,” “Ilik A Badoc,” “Kasano A Lipatenka,” “Lovingly Yours” ken “Naisangsangayanka a Bukel.”

*     *     *

Pagimasanna iti daytoy nga album, ‘bagis, saan laeng a nagtinnulongan da Marie ken Vhen a buklen.

Nangidiaya met iti tulong dagiti papagayamda a mannurat nga agaramid iti liriko a kas kada Alvin John Fengers (Alvin Dalere), Imelda Duque Toledo, Imelda Batara Alibuyog, Victorino Marquez, Rudy Ram. Rumbaoa, Alexander Rafanan Yago, Alexander Barut, ken Ariel S. Tabag.

Kasta met a timmulong ni Israel Allen Pascua. Isu ti nangtokar ken nangurnos kadagiti amin a kanta.

*     *     *

Kuna ni Marie, ‘bagis, kaaduan a kanta iti album, nairanta a naputar para kenkuana.

Kaaduan a pakasaritaan ti ayat ken biagna kas naasawaan ken Ilokana nga adda iti adayo a lugar.

*     *     *

Iti met biang ni Vhen Bautista, agtultuloy latta ti pannakitinnulongna kadagiti mannurat, musiko ken kumakanta nga Ilokano tapno agtultuloy ti pannakaputar ti Musika Ilokana.

Mabalin ngarud nga ibaga a daytoy “Lovingly Yours, Marie” ket album a mangipaneknek a ti musika latta ti pagsarakan dagiti musiko nga Ilokano, nga iti daytoy a biang da Marie ken Vhen, agpadan nga adda iti abrod, ngem gapu iti Musika Ilokana, adda agsapsapul ken adda nasapulan.

Tapno, kas iti kunada, agtultuloy ti musika…—O


(Naipablaak iti Bannawag, "Di Pay Naluto Naibusen" a kolum ni Angelo Padua iti Pebrero 11, 2013 a bilang.)


11.24.2012

Ni Sedric ti Baro a Bituen, ‘Bagis!


Ti akkub ti album ni Sedric



ADDA baro a bituen iti lubong ti Musika Ilokana!

Dayta man ti iny-e-mail ni mannurat Delfin P. Dumayas, ‘bagis.

Ket maysa kano pay nga ubing nga agtawen laeng iti walo. Isu ni Sedric Lacar Cansancio.

Segun ken ni ‘Bagis Delfin, ‘bagis, inistoria dagiti dadakkel ni Sedric a da Sanny ken Emelyne, dua a tawen laeng ni Sedric, naayaten nga agkantakanta. Gagangay iti ubing, saan a nalawag ken beddabedal. Ay ngem maitugotanen nga adda pangabil ti timekna.

No tallo ti tawen ni Billy Crawford idi madlawda a talentado nga agkanta, ni Sedric, dua a tawenna laeng.

Agasem!

*    *    *

Idi simreken iti eskuela, masansanen nga agkanta ni Sedric— awan ti pasken a lumabas a di agkanta. Banag a pakaay-aywan dagiti mamaestrana iti Catterpilar Center for Early Learner, Inc,. iti Siudad ti Laoag, a da Fe Ramos ken Pamela Ramos.

Ni Sedric, ‘bagis, ti superstar iti eskuelana!

*    *    *

Ket ti simmaruno?

Addan album ni Sedric, ‘bagis.

Napauluan iti “Dagiti Pakasaritaan a Naikanta,” buklen daytoy ti sangapulo ket siam a kanta.

Dagitoyda man: “Balasang nga Ilokana,” “Rag-o ni Karayo,” “Biag ni Hawayano,” “Nanang ken Tatang,” “Lua iti Tapok,” “Idol Ko si Kap,” “In Love,” Sadiay Hawaii,” “Umuna ken Maudi,” “Sakada,” “Welkam, Balikbayan,” “Kaanonto,” “Magpakailanman,” “Kalapaw iti Tapao,” “Maasika,” “Ina,” “Dua a Banag,” “Aramid ti Lalaki,” ken “Pagudpud.”

Aysus, no siak idi agtawen iti walo, ‘bagis, uray ta paulona pay laeng, diakon maikabesa.

Ngem no ni Sedric, ay, saluyotenna, a!

*    *    *

Naidumduma pay daytoy umuna nga album ni Sedric, ‘bagis.

Wen, a, ta kakaduana dagiti agkakalaing a kumakanta a kas kada Vhen Bautista, Joanne Domingo, Eden Abarra, Rachelle Mamaclay ken Noel Navarette.

Ket amin dagitoy, agrukbab iti kabaelan ni Sedric!

*    *    *

Garantisado met ti kalidad dagiti kanta ni Sedric, bagis.

Ta dagiti mabigbig a kompositor nga Ilokano dagiti nangipaay iti putarda a kas kada Benny Ventura, Bonnie Manuel, Sonny Dancel, Ericson Paulo ken Joyven Sison.

Saan met a nagpamayan a simmaranay da Flor Martinez ken Ernie Bautista iti Hawaii.

Wen, addan iti Hawaii ti rimat ti bituen ni Sedric, ‘bagis!

Saan ngarud a bumasol ni ‘Bagis Delfin iti kunana nga addan baro a bituen iti lubong ti musika Ilokana.

Kablaawandaka, Sedric!—O


(Naipablaak iti Bannawag, Disiembre 3, 2012 a bilang, iti seksion a Showbiz, "Di Pay Naluto, Naibusen" a kolum ni Angelo "Eloy" Padua.) 



11.06.2012

Panagpaadu




Nagtayyec ti tarampo iti tengngana,
Ti lubong nagtayyec cadagiti matana!
   Ti pigsa nagbalin, ti pudot nagbalin,
   Ti bukel rimmusing, ti init simmingising.

Nagtayyec ti tarampo iti tengngana,
Ti lubong nagtayyec cadagiti matana!
  Ti pigsa nayallatiw
Ti lubong nagsagawisiw…
Tao ken tao
Agbalin a tallo.


--GODOFREDO S. REYES

(Naadaw daytoy a daniw a kas iti orihinal a pannakaisuratna iti Kutibeng: Philippine Poetry in Iloko, 1621-1971 nga inurnong ken inedit ni Marcelino A. Foronda, Jr. a naipablaak idi 1976 babaen ti De La Salle University, Manila. Inadaw met ni Dr. Foronda ti nasao a daniw iti koleksion ti autor a nasurat idi apagtapog ti 1950s. Naipablaak iti Bannawag, Marso 19, 2012 a bilang.)

11.05.2012

Daliasat Uno




Ti panagsangpet ket panagpanaw met,
ti panagsardeng ket isu met laeng ti panagrubuat,
ket agtangep ti ridaw
ken agrikab dagiti tawa ti kalapaw,
kalpasan a mayebkasmo dagiti umel a pakada,
ti panagibilin
kadagiti mapanawan a kadua iti apagkanito,
adda bara ti abrasa a kas man aggapu iti temtem
a rummuar ti daga, umarakup a kas kapigket ti allid
wenno ti pulitipot nga isem ti sipnget
ti apagsipasip uray no kasla mairik
ti botas a kombat ti salemsem: agkayabkayab nga angin,
singin ti rissik, ngayemngem ti arakup
ti dumupir a masabet:
agsirko ti utek a tumpuak iti puso,
masirut ti pulso a sumarut
iti dapan: manaktuol dagiti bato, maikubray
ti darat, takki ti nuang a manalpaak,
ti nisnis ket mauyos, naangot
a pinabuyok ti ling-et, ti pay-od
ti istakeds ti rabii a ngumayngayebngeb.

Darupen latta dagiti dapan
ti turod ken ti anawang,
ti tambak ken uray dagiti limbang. Ania ngarud
no manabsuok iti burubor a naangot? Ania
ngarud no ramay laeng koma ti kumarawa
ngem uray mukod 'yarikapmon, a, latta?

Ket no kastan a dim' metten mataliaw
ti naggapuan, adda met latta sumangpet
a kakadua, kasla met laeng maipukkaw
dagiti paarasaas a kablaaw:
naggapuam?
papanam?
kaduam?
Ket matapik ti password, wen, abra
kada abra,
ken maritur pay ti sentido a manglagip
kadagiti alias: karamukom ti bayabas,
kasingin ti granada, ti marabutit a bao,
uray ania ditan ti kaipapananna, karpa
kahel, saba, bado a rutrot
anglem ti dara, adu, kas man
ukay-ukay a sinaksako,
maiburandis a masigkay
ti daan manipud iti kabarbaro.
Maibaga amin dagitoy
iti irut ti pinnasungad ken pinnasangbay
dagiti sarsarita ken salsalaysay;
iti met sungadan ken ti pagsangaan
a maikurimed ti panagpitik ti agtultuloy
a panagdaliasat ti anniniwan:
periodista seminarista pasabilis,
mannalon mangngalap aktibista,
doktora a kadre baliktad a polis,
kumebkeb ngem sumiripka met laeng
a mangsiput iti panagtungpal gilap
ti lawag a maukas iti gatilio ti garand,
maitungpal laeng dagiti plano a lininay ti manon
a panagibarangabang, ti dim' mabilang
a panaginiin:
An'a dayta, garand?
Wen, sinibarutko idi iti naiwalang...
Kawas met, dayta ket?
Punial, ha ha ha, dayta?
.357, baro? Wen. Aglatlati met,
kurang ti asa. Ladawan, porma
dagsen ken angot
ti panagkubukob uray no nakakidemka,
mailadawan ken itedda ti ehemplo
ket maammuam ti husto,
maadalmo ti usar ti uray ania
a kastoy: ni Tonio intakderna
ti nagiwarasiwis iti kastoy
ket narba ti kampo:
kukuatayo ti daga!
Ti apit, ti waya!
Kastoy ti tiket, italimengmo
ti amin a riknam dita pusom.

Addakan iti pagsasangaan,
adda nadalus a dalan
ken adda met rumiet iti masanguanan.
Wenno, mabalinmo met a raatan
ti bukodmo a desdes a pagturongan?

Agkutukot ti tumengmo
a mangsikkarud iti linnaaw,
matnag a sippawen ti dam-eg
ti daga a marim-it iti baddek
ti nawaya a dapan
(nakaabadayen ti botas
a kombat iti abaga)
nga agpasungad iti kanito
a maagaw ti lawag
ti ngayed ti sipnget
ket mailukip ti tawa
ket ibuang ti ridaw
ti panagsangbaymo.

Ti waneswes ti imam a maitag-ay
ken ti maminpito a kanabtuog ti gemgemmo
iti barukongmo ti rukod
ti balligi nga insangpetmo.
Ket iti isasar-ongmo, kunami:
adda latta karit ti dana
a daliasatem a balonmo iti yagyag ti tignay
ket agbalin nga anibmo ti derrep dagiti tagtagainep.

--FLORENTINO B. LORENZANA
Agoo, La Union


(Naadaw iti basirepublic.blogspot.com.)