Agrimrimat Latta ni Idol Vhen Bautista

TI sumaganad ti kolum ni Kabagis Angelo "Eloy" Padua, presidente ti FAMAS, iti Bannawag a napauluan "Di Pay Naluto, Naibusen" iti seksion ti Showbiz nga ed-editen daytoy numo.

Nakaay-ayat a maammuan nga agtultuloy latta ti panagkankanta ken panagpartuat iti kanta ni Apo Vhen Bautista, ti ibilang ti kaaduan a Prince of Ilocano Songs (panagkunak, sumagmamano pay a tawen, mabalinen nga awagan iti "Ari Dagiti Kanta nga Ilokano"). Iti laksid nga adda iti abrod ken adda met iti agduduma a nasion dagiti masansan a kabinnuligna kadagiti proyektona. Ta malaksid iti panagpartuatna iti kanta a kantaenna mismo, agparpartuat pay iti kankanta para kadagiti nadumaduma a singer nga Ilokano. Ken siempre, masansan nga isu ti prodiuser.

Dagiti kas kada Apo Vhen ti umadu koma pay. Tapno ti kantan ni Ilokano, agtultuloy ti panagallangogangna iti sangalubongan.

Kabayatanna, adtoy ti kolum ni Kabagis Eloy:

Ni Vhen Bautista iti pannakaipaay
kenkuana ti 2011 GAWAD Amerika.

Agtultuloy ti Panagrimat ni Idol Vhen!

IMPADAMAG man ni ‘Bagis Eliseo B. Contillo nga adda manen award ni Prince of Ilocano Songs a ni Vhen Bautista. Binigbig ti 10th Annual GAWAD Amerika idiay Los Angeles itay Nobiembre 2011 ni Vhen a kas "Prinsipe Dagiti Kankanta nga Iluko."

Gapu daytoy iti awan sarday a panangitandudona iti musika dagiti Filipino (am-ammo a kas Chino Romero kadagiti kantana iti Tagalog) nangruna ni Ilokano iti America ken dadduma pay a paset ti lubong a pakadanonan dagiti albumna.

Kasano ti katan-okna daytoy GAWAD Amerika, ‘bagis?

Dagitoy man ti kakadua ni Idol Vhen a napadayawan: Dip. Manny Pacquiao, Sen. Nene Pimentel,

Direk Wenn Deramas, Beauty Queen Venus Raj, ken dadduma pay a nalatak a personalidad.

* * *

Tinawen a maipapaay, daytoy GAWAD Amerika, ‘bagis, ti grupo dagiti mangbigbigbig iti talento dagiti Pinoy iti sangalubongan nangruna iti tay-ak ti musika, isport, pelikula, negosio, ken politika.

Ket daytoy ti nakaay-ayat, ‘bagis: Iti panagpilpili ti nasao a grupo iti theme song, ti kanta ni Idol Vhen ti napilida.

* * *

Malaksid iti nasao nga award, sabali laeng met ti inted ti Kultura ti Amianan, Inc. nga idauluan ni ‘Bagis Angel Calso, dati a mannurat iti Bannawag, itoy Marso 17, 2012 iti naangay a programa iti Manila Hotel.

Nabigbig ni Idol Vhen a kas kangrunaan a mangitagtag-ay iti kultura ti Ilokandia babaen kadagiti adu a kantana ken kas "Prince of Ilocano Songs."

Asino met dagiti kakaduana a napadayawan ditoy, ‘bagis?

Da Freddie Aguilar, Joel Macanaya ti Rainmakers, ken dadduma pay nga Ilokano a kumakanta.

* * *

Kabayatanna, kuna met ni laeng ni ‘Bagis Rudy (awagmi ken ni ‘Bagis Eliseo) nga awan sarday ti panagkonsierto ni Idol Vhen iti US ken Canada.

Nabiit pay, inawis ni Manny Calura (i-Narvacan, I.S. ngem agnaeden idiay Edmonton, Canada) nga agkonsierto iti Alberta. Kadua ni Idol Vhen a nagkanta da Keanu Ven, Mikaela Vien Canto Bautista, ken Rema Canto Zoleta.

Agtultuloy met ti panagaramidna iti album. Kaudian ti “Homesick Versus Dollar” a nagkaduaanda ken Noraline Domingo. Naipalaon iti nasao nga album ti 19 a kansion a para kadagiti OFWs nga inyalnag ti Rosa Records babaen ken ni Rosa D. Lao ken timmulongan nga improdius da Carlos & Pat Pucan, Jesse ken Norma Santos, Rizal ken Frances Cajimat, Ben ken Flora Sacro, Florida Isla, Bobot ken Edna Butay, Mel ken Sylvia Gonzales, Benny ken Nora Rieta ken Alex Barut.

* * *

Agtultuloy met ti mini concert ni Idol Vhen kadagiti nadumaduma a radio stations iti Hawaii ken Filipinas a kas iti “Linglingay iti Sardam” iti KNUI iti Maui a programa ni Boboy Patao, “Edna's Afternoon Delight Honolulu” babaen ken ni Edna Butay, “Rimat Dagiti Bituen” babaen ken ni Freddie Boy Tan iti DWRS, “Kiddaw ken Sagut” iti DZNL babaen ken ni Ruben Ballesteros, ken iti “Radyo Natin” Candon FM station babaen ti DJ Vhen & Kidz Muzic Live.

Malaksid itoy, ‘bagis, adda pay maysa nga oras nga edition ni Idol Vhen iti Iluko.com babaen ken ni Webmaster Andy Barroga.

Dakulapendaka iti nairut, Idol Vhen!—O

(Naipablaak iti Bannawag, Marso 26, 2012 a bilang.)

Ni Alexander Reyes Barut Kas Kumakanta

NAAM-AMMOK ni Apo Alexander Reyes Barut iti Facebook, kas maysa a mannaniw. No diak mariro, nagsagangkami iti maysa a thread a ti patangan ket sex. Kalpasanna, nangidatag iti daniw a para Bannawag a ti subject-na ket sex, sa kalpasanna nangidatag iti daniw para iti proyekto a libro a napauluan "Alimpatok," ti antolohia dagiti erotiko a daniw dagiti Ilokano.

Idi kuan, nagumbi iti maysa a lyrics ti kanta a paaramidanna kano iti melodiana ken ni Apo Vhen Bautista. Gapu ta Vhen Bautista, kunana, dagus a nayatak ken pinagpilik pay ketdin no adda makursonadaanna a daniw a mabalin a ragasen a kanta iti blog-ko (pakarsoniasseng.blogspot.com).

Dina nadakdakamat a ti paulo ti album nga isagsagana a "For Adults Only." Ta no nadakamatna koma, inyaramidak koma iti erotiko a lyrics. Ngem blessing in disguise ta daydiay napilina a daniw a nagbalinen a kanta a napauluan iti "Apay," sangkasaona nga adu kano ti makagusto.

Manipud iti simple a panagam-ammo iti FB, nagtalek metten ni Angkol Alex (awagko kenkuana) kaniak ket kunana pay ketdin nga italekna kaniak ti sumagmamano a kopia ti albumna nga ilakok ditoy Filipinas. Ket kas maysa a cowboy a nakasagana para iti ania man a panagdur-as ti musika dagiti Ilokano.

Nakaay-ayat daytoy nga album ni Angkol Alex ta napagsuratna iti lyrics dagiti pamiliar a nagan iti Daniw Ilokano a kas kada Roy V. Aragon, Jonathan Torricer, Derick Marcel Yabes, Rudy Rumbaoa, ken dadduma pay. Sabali la nga agpayso no ti puonan ket panagpapagayam ken panagkakadua.

Ti maysa laeng a singasingko, no bilang itultuloy ni Angkol Alex ti career-na kas pudpudno a singer, ALEXANDER lattan ti naganna kas singer. Kasla koma ngay ni CHARICE a charice lattan, hehehe.

Ay wen, gayam, maysa a maestro ni Angkol Alex-- statistician, wenno nalaing iti Math. Mannaniw ken no maikkan iti gundaway, amangan no nalaing a mannurat iti sarita a makapakatawa.

Adtoy man ti maipanggep ken ni Angkol Alex a naipablaak iti kolum ni Kabagis Angelo "Eloy" Padua a "Di Pay Naluto, Naibusen" iti Pebrero 20, 2012 a bilang ti Bannawag:

Ni Maestro Alex bayat ti panaginanana
kalpasan ti panagirekordna iti kanta.

Tawayam Man Daytoy “For Adults Only” ni Maestro Alex, ‘Bagis!

WEN, isu dayta ti baro nga album dagiti kankanta nga Ilokano, ‘bagis.

Ti singer?

Ni Maestro Alexander Reyes Barut— Maestro Alex, for short.

Saan a gapu ta “short” kano.

Ketdi, tapno natartarus.

* * *

Maestro ngamin ti propesion ni Maestro Alex, ‘bagis.

Tubo iti Vintar, Ilocos Norte ken nadumaduma a pagadalan iti nasao a probinsia ti nagisuruanna.

Nagbalin pay ketdi a provincial statistician. Agingga nga indanon ti kina-statistician-na iti National Statistics Office.

Idinto a ti kinamaestrona, isu ti nangidanon kenkuana idiay Jefferson High School, Jefferson, Texas, USA a pangisursuruanna iti agdama.

* * *

Idinto a ti kinamannakigayyemna, isu ti nangidanon kenkuana iti Facebook nga isu met ti nakatakuatan dagiti gagayyemna iti talentona iti panagdaniw (mannaniw met isuna iti Bannawag), ken iti panagkanta.

Agingga nga adda nangikari a mangaramid iti lyrics.

Adda nangikari a mangaramid iti melodia.

Adda nangikari a maki-duet (saan met siguro nga awan talekda iti pintas ti timekna).

Adda nangikari nga agbalin nga arranger.

Adda nangikari a mangiprodius.

Ket nabukel, ‘bagis, daytoy “For Adults Only” ni Maestro Alex.

* * *

Iti ababa a pannao, ad-adda a panaggagayyem dagiti Ilokano artists ken musicians ti nagpuonan daytoy nga album, ‘bagis.

Asino met dagitoy a gagayyem ni Maestro Alex?

Dagiti musikero/singer nga Ilokano a kas kada Vhen Bautista, Noraline Domingo, Jerameel Perucho Contreras ken Allen Israel Pascua.

Dagiti mannurat nga Ilokano a kas kada Roy V. Aragon, Jonathan Torricer, Joel B. Manuel, Rudy Ram. Rumbaoa, Derick Marcel F. Yabes, Bert Ugalino,Vilmer Viloria, Remy Piano, Alvin John Dalere, Florencio Bangasan, ken Ariel S. Tabag.

Malagipmo dagita a nagan, aya, ‘bagis? Wen, a, ta mannurat iti Bannawag ti kaaduan kadakuada.

Kuna ngarud ni Maestro Alex, ‘bagis, a dakkel kano ti benepisio ti mannakigayyem.

Mamatiak kenkuana, ‘bagis.

* * *

Buklen ti 19 a kanta, manamnama a mayalnag ti album itoy umuna a kagudua ti tawen.

Nupay kasta, nangiruaren ni Maestro Alex kadagiti “pangramanan” iti YouTube ken iti Facebook.

Ken uray iti radio.

Kuna da Maestro Alex ken Idol Vhen, nga itoy a Pebrero, “tune to watch” kadagiti radio iti Hawaii daytoy “Apay” a maysa kadagiti kanta iti album.

Ania magagarankan a mangtaway iti “For Adults Only,” ‘bagis?

Makigayyemka ngaruden ken ni Maestro Alex iti Facebook. (ANGELO 'ELOY' PADUA)

(Ti Rosa Records, Philippines iti babaen ti Aweng Records Music Production & Distribution, USA,ti prodiuser ti “For Adults Only” nga album. No kayatyo ti maaddaan iti kopia, i-friend ti Alex Reyes Barut iti Facebook sa agorder babaen ti pribado a mensahe.—AST )

Dagitoy man ti sampol ti kanta a maipalaon iti "For Adults Only" nga album

Apay:




Rakrak a Rikna:

Iti Viewdeck

Iti viewdeck ti Mt. Kabuyao

Makitam ti sentro

Ti siudad a kabambantayan

Naulsan iti nangisit a lupot

Ken nasilawsilawan

Kas ariwanas iti paraangan

Napintas, kunam?

Inka ngarud piktiuran

Samo ipangan dagiti nalingdan iti sipnget

Isakmolmo dagiti palasio

A mangidikdiktar iti pagsayaatam

Dilpatam dagiti prinsipioda

A mangpespespes kenka a kasla lupot

Ngalngalem dagiti babaknang

A mangibagbaga a dangngaka

Ta maud-udika iti taray ti kapitalismo

Karemkemem dagiti nangangato ti kidayda

A surot la a surot no ania man ti uso

Tilmonem ketdi dagiti ulbod

A mangpispis-it kenka

Agingga a bayadam dagiti ania man

A naitedda a serbisio

Umno ketdi a ramanam ida sagpaminsan

Uray piktiur laeng

Ta agingga ita

Nakatakderka pay laeng

Iti viewdeck ti Mt. Kabuyao

Makitkitam dagiti inaramidda

Idiay siudad ti kabambantayan.

--ROSALIE V. CALPITO

Camiling, Tarlac

(Naipablaak iti Bannawag, Marso 21, 2011 a bilang.)

Kastoy nga Imbunubonko Dagiti Sarita iti Danum, Imnas

Kastoy nga imbunubonko dagiti sarita iti danum, Imnas

Maysaak a pitakpitak, siitsiitan, immuging, sidudunor a lasag,

Maysa a taraytaray a dinilpatan ti lawag

Nalmes iti danum nga ininumna, agkaykayaw-at

A mangbugbuggo iti daga

Kadagiti balikas.

Sangapulo ket dua a tawen nga inipusko ti parbangon

Dinandanogko dagiti ulimekna, dagiti riknana- agtaraok iti sangit, garakgak

Rinabsutko kenkuana dagiti ladawan ti lidem ken lawag,

Mapa nga iggem dagiti dumadaniw, dumadaliasat iti kannag

Nagnaak iti kasiitan dagiti timek

Dagiti natayan iti timek

Dagiti nabagsol ti ayatna iti kainaran

Nakimaroak kadagiti kinapudno a lako dagiti karuotan

A nanglukais iti lumasat a gimong.

A nanglibas iti pagsasao iti paginuduan.

Nagimetak iti bibig ti apuy: daniw, balikas, bitla,

A nangpamaga kadagiti nangisit a danum

A nangsellep iti payak

Ti alimuken

Saritaek kenka:

Adda dan-aw dagiti baliang a nangperreng iti init

Kadagiti sabongda. Kinalay-atko ti sanga ti agwagwagwag a sirib

A nangagmuy iti aggilgilap a pingpingna

Nagtakderak iti kuko ti pannakawaw, ti bisin

Daytoy ti pupogan a nakatag-ay iti eppes nga angin

Imburaisko ti ariwanas iti dakulap ti danum, agkantaak, agbitlaak

Rutayrutay dagiti ayug a tinali ti kinakurapayko

Iti rabaw ti inut-utangko a tagainep, ngem nakitak!

Nakitak sadiay ti dila ti langit, ti tammudo ti kanito

Nakitak sadiay a nagikur-it ti tangatang

Kadagiti bannugis ti apuy a diak maawatan!

Nakilumba ti taraytaray iti muging dagiti anninaw a nakanganga

Tinuklaw ti buntiek ti angin, ti angin ti angesko

Naisugel dagiti ulep; simmalog dagiti gikgik

A nangkarkariar iti isem ti langit

Ngem immulog ti ulimek a nagdalungdong iti sabidong ti lubong

Dimmuros ti kasaor a nagriaw iti basol

Kinagubaldak iti kinakapsutko, kadagiti sugatko, iti danum

Ket ginepgeppasko ti karabukobda

Iti iking ti baliang.

Tapno maawatam itan no apay, Imnas

A sidadasayak, sisusugat iti igid a labaslabasan ti kannag,

Pagpaggaakan dagiti lawlawigan nga aglanglang-ay iti pannakatay,

Sipsiputak dagiti ima ti langit nga agikur-it iti pangngarig,

Dengdenggek ti daniw ti petalo ti init, ti gura

Dagiti darat nga agsungsung-ab.

--JOEL B. MANUEL

Banna, Ilocos Norte

(Naipablaak iti Bannawag, Marso 10. 2008 a bilang, ken nairaman iti "Kastoy Nga Imbunubonmi Dagiti Balikas," antolohia dagiti daniw nga Ilokano nga inedit da Joel B. Manuel ken Ariel S. Tabag. Metro Manila: GUMIL Filipinas Tagnawa 2010.)

Dallot ken Komedia, Panggep a Parimaten Daytoy a Pagadalan

Maliplipatanen ti dallot ken komedia. Ngem iti biang ti Banna National High School (BNHS) iti Banna, Ilocos Norte, nasken a maisubli koma manen dagitoy iti imatang dagiti umili ta paset dagitoy ti namaris a pakasaritaan ti puli ni Ilokano malaksid a mabalin met a pagbalinen dagitoy a paset ti biag ti agdama a kaputotan.

Mainaig itoy, maysa a panagsanay iti dallot ken Komedia Ilokana ti insayangkat ti BNNHS nga idauluan ni mannurat iti Bannawag Joel B. Manuel, prinsipal ti nasao a pagadalan, iti pannarabay ti National Commission on Culture and the Arts (NCCA) idi Marso 1 agingga iti 4.

Napanaganan ti panagsanay iti “BUYANIW: Ilokano Performance Arts Training in Dallot and Komedia,” mismo a ti Pangulo ti Arts Section ti NCCA, ni Ferdinand P. Isleta, a patneng met nga Ilokano, ti naawis a kangrunaan a nagsarita ken nangsanay.

Kas Head ti Arts Section NCCA), naigamer ni Isleta, tubo iti Dingras, Ilocos Norte, kadagiti nadumaduma a proyekto ti NCCA sipud pay idi 1993, a kas Project Coordinator wenno kas Director iti adun a national ken regional visual and performing arts congress, exhibition ken festival. Nagpaay pay nga opisial a delegado kadagiti internasional a panagtitipon a kas iti UNDP Culture & Administration Human Resource Development Program a naangay iti South Korea, iti 13th ken 14th Meeting ti ASEAN Technical Working Group for Visual and Performing Arts a naangay iti Indonesia; iti 33rd Meeting ti ASEAN Committee on Culture and Information a naangay iti Singapore ken iti 34th ASEAN-COCI a naangay iti Manila. Nagakem pay a Head ti Philippine Delegation iti ASEAN Youth Art Camp 2001 iti Malaysia ken iti ASEAN Youth Art Camp 2002 iti Myanmar. Naipaayan iti scholarship idi 2008 babaen ti Arts Council ti Korea a kas maysa kadagiti partisipante iti “Cultural Administration Training Program for Young Professionals”. Idi 1990, imbagianna ti Filipinas a kas maysa kadagiti kameng ti Lyceum Dance Troupe a nakipartisipar iti La Farandole de Nice Dance Festival a naangay iti Nice, France.

Kadua ni Isleta a nangsanay da Elizabeth Madarang Raquel, public schools district supervisor ti Currimao District ken maysa a coordinator iti NCCA-Committee on Literary Arts; Guillermo I. Concepcion, mabigbig a mannaniw, piksionista ken agkomkomedia; Mario P. Tejada, Sangguniang Bayan secretary ti Piddig, mannurat ken dumadallot; ken Cles B. Rambaud, Managing Editor ti Bannawag.

Nagserbi met a kas project director ni Rolando D. Tubera, mannursuro iti BNHS ken premiado met a mannurat iti Ilokano. Timmulong amin dagiti mannursuro iti nasao a pagadalan a kas project assistants.

Nasanay ti aganay a 30 nga agad-adal iti BNHS iti panagakem, panagyayug iti dallot ken komedia ken naisuro met kadakuada dagiti masapul a gamigam, aruaten, musika ti dallot ken komedia.

Adda pay paset ti panagsanay a panangamiris dagiti agad-adal iti iskrip. Kas pangipakatan met dagitoy iti naadalda iti nasao a panagsanay, addanto maangay a panagpabuya dagitoy iti arinunos ti Marso.

Maipabuya a panagdaniw ti kayat a sawen ti buyaniw, ket mausar daytoy a termino a pangsakup kadagiti isu amin a maipabuya a daniw a kas koma iti dallot, komedia, bukanegan, sarindaniw ken danirock (daniw a maakompaniaran iti rock a musika).

(Naipablaak iti Bannawag, Marso 12, 2012 a bilang.)

Ti Pusak a Gusing

Adda pusak a gusing

Ti naganna ket Muning

Lapayagna't nagluping

Ta sobra't kinakusim

Burborna kasla uging

Ipusna kasla ruting

Manmano nga uminum

Ta kabutengnat' danum

Ngem 'toy pusak nalaing

Uray matana't balling

Tukmaannat' masiim

Bao nga agkutkutim

Diak pulos nga agdanag

A makuriban 'toy bag

Ta pusak bantayanna

Aruatek nga agbasa

No siakon 'tay agukag

Leksionko iti papag

Pusak umay agsadag

Tapno makipagukag

No siak 'tay agsuyaab

Agngiaw daytoy pusak

Leksion innak ileppas

Atiwek kinalaglag

Itan ta sinursuruak

'Toy dungdunguek a pusak

Saanen a nakusim

Gusingna, ay, limmaing!

--DERICK MARCEL F. YABES

Sanchez Mira, Cagayan

(Maikadua a Gunggona, RFAAFIL 2011, salip iti daniw a para ubbing)