Madre Sanchez Mira: Dua a Kalikagum

1.

Lagaek koma man a kasla silag

Dagiti lumtuad a binatog

Ti daniw ditoy barukong

A pagiladam a mangbuybuya

Kadagiti aglanglangoy nga ulep

Batokbatoken ti bulan—

Makilinlinnemmengan

Kadagita kabus a matam

Idinto nga agkulkulalanti dagiti bituen

A mangkidmakidmat iti pakabuklam.

2.

Siak koma ‘tay pul-oy a mangyapros

Samiweng ti nakaparsuaan

Iti lengnges, iti puon dagita lapayag

Agay-ayamak kadagiti linabag ‘ta buok

Ken muldot…

Agkarayamak nga umuli kadagiti bantay

Agdakiwasak iti pantok sa wanawanak

Ti kasla awan patinggana a tanap—

Agingga nga aguyasak

Iti awis ti bang-i ti kataltalonan.

--DERICK MARCEL F. YABES

Sanchez Mira, Cagayan

(Naipablaak iti Bannawag, Hulio 23, 2012 a bilang.)

Ti Pusak a Gusing

Adda pusak a gusing

Ti naganna ket Muning

Lapayagna't nagluping

Ta sobra't kinakusim

Burborna kasla uging

Ipusna kasla ruting

Manmano nga uminum

Ta kabutengnat' danum

Ngem 'toy pusak nalaing

Uray matana't balling

Tukmaannat' masiim

Bao nga agkutkutim

Diak pulos nga agdanag

A makuriban 'toy bag

Ta pusak bantayanna

Aruatek nga agbasa

No siakon 'tay agukag

Leksionko iti papag

Pusak umay agsadag

Tapno makipagukag

No siak 'tay agsuyaab

Agngiaw daytoy pusak

Leksion innak ileppas

Atiwek kinalaglag

Itan ta sinursuruak

'Toy dungdunguek a pusak

Saanen a nakusim

Gusingna, ay, limmaing!

--DERICK MARCEL F. YABES

Sanchez Mira, Cagayan

(Maikadua a Gunggona, RFAAFIL 2011, salip iti daniw a para ubbing)