(para ken ni A)
nagminnirata
iti naminsan a sardam
mata ken
mata, agin-innisem
matmatmatak
'ta pakabuklam
a di pay
namarisan iti rugit
nga itden
ti panagtaeng.
insuronaka
kadin ni inam
nga
agkanta iti samiweng maipapan iti kulibangbang
nga idi
nagawid ket kellaat a nagsangit
ta dinan
nagtengan ni amana
a
pimmusay iti saklot ti sagutna nga ay-ayam?
ammom
ngata nga amirisen
ti
panagsangit dagiti riari—
aglemlemmeng,
nakalinged kadagiti kayo,
nakadulin
iti nabalkot a bulong, bulong
a no
puyotam, maparnuay ti nasam-it nga aweng?
nangngegmo
kadin ti panagdayyeng dagiti billit
nga
agin-inana iti sanga ti pakak?
agur-uray
iti matnag a grasia, kapanunotan
a
naigamer kadagiti kuerdas, harana
a
nangitulod kenka iti ridep.
sinaludsodmo
kadin ken ni amam
no apay a
rabiin no tumayab dagiti kurarapnit?
nasdaawkayo
kadin a dua
no apay
nga iti bakrang ti dakkel a kayo
ti
pagindegan dagitoy a parsua?
napadasam
kadin ti naggarikgik
gapu iti
nangngegmo a kanta
maipapan
kadagiti pato nga agkinnikinni ti patongda?
wenno
maipapan iti kalapati nga addaan iti kulot a buok
a napan
nagdigos iti karayan nga agay-ayus?
gapu
kenka innak naamiris
nga adda
dagiti banag a nasken nga ibati,
saan a
rumbeng nga itugot iti sadino man
agtalinaed
lattan iti nagyelo a kadaratan
ngem
mabalin met latta a subliasublian.
nagminnirata
nga agpayso iti naminsan a sardam
ngem dita
met nagkinnaawatan
ta maysa,
awanka iti dennak
ngem
addaka iti kaunggak
am-ammokan
ngem dita pay nagsarak.
--PEARL
LOVEDYN A. DACUAG
Bombo
Radyo, Baguio City / Gamu, Isabela
(Naipablaak iti Bannawag,
Septiembre 10, 2012 a bilang.)
