Essem

(i)

dimo koma timuden pay

            pasidumri ti kulibangbang

                        ti sabong

saan nga agukrad iti malem:

            saan a rosas, wen

                        ti maris

dagiti kuko ti agpatnag

iti saklot ti ngatangata

            nasken ti kanta

                        kas ibit

a mamagungar iti nagleppes a langit.

(ii)

adda dagiti sugat

             a di mapaglunnit

                        ti panawen

saan a pananglipat amin a saem:

            no maminsan, nasken

                        ti sugat

a mangtignay iti kidser ti lasag

mangkimmay narnekan a resga

            adda pitik a nakana

                        a kamalala

ti isem maipasngay nga agsapa.

--REYNALDO A. DUQUE

Candon, Ilocos Sur / Parañaque City

(Naipablaak iti Bannawag, Pebrero 13, 2012 a bilang.)

Sariugma I

saan latta a mapnek, naikudi

ti banias nga agsisiim iti suli

mangseppeg iti piek ti rabii

sinallukob payak ti kalapati

a nalip-ak. ti lib-at, kas umsi

dumteng iti wagas a namikki

di mapupuotan: adda umbi

a gita iti kuspag ti pammati

mangtaraken biddut a mailili

kullaap ti nakem a di marubsi:--

ti banias agbiag a maisupadi

iti lamina ti bin-i a mailangi.

ti tao kas piek a sumsumiasi

iti rukod kenkuana nga imbati

dagiti nariinganna a baddi.

a, ngem ti atang! apay man kadi

a dina napatangan ti kaasi

ti banias a naslag a tagibi

ti riwet, bileg a di agati

kuspag nga aragaag ti puli?

agkay-ab latta ti kalapati

a payakna ti nalip-ak. ti nibi

ti babak imetna ti rabii

pupogenna ti piek iti suli.

--REYNALDO A. DUQUE

Bagani Ubbog, Candon City / Parañaque City

(Naipablaak iti Bannawag, Disiembre 1, 2008. Immuna a naipaskil iti basirepublic.blogspot.com.)