Ditoy Libingan ng mga Bayani

Ditoy Libingan ng mga Bayani

agsala met dagiti busbusi iti baet dagiti krus

a nataratar a nayurit iti batogmi.

Iti ngatuenmi a langit,

situtured latta salsallapingaw nga agkanta,

iti baet dagiti paningping ti AK47.

Dakami dagiti natay

sibibiag sumagmamano a tawen laeng

nariknami met ti linnaaw iti parbangon

nadigoskami met iti bimmalitok a lawag

ti lumlumnek nga init iti Manila Bay

sadiay, nagbatok dagiti kakaduami iti tahong

pagpapigsada nga aggaud iti dragon boat

ta narangranga dagiti mestiso ngem dakami.

Nakilumbakami a naglangoy

kadagiti agwaras a langis ken basura

kaskam’ la agdardaras nga agpundo

sadiay Corregidor a pakaipasulianmi.

Nagayat ken paayat

Ita, addakamin ditoy Libingan ng mga Bayani.

Ibaklaymo man met koma

ti napaypayso a gubat iti kabusor

kinaawan-adal, kinapanglaw, kinaganggannaet iti bukod a daga.

Sika a gayyem ken kaadalan dagiti baknang a minero

a makasapul iti teritorio inwalinda ni Tentorio

mangpapatay kadagiti padi

isuda a mangisaksakit iti nakaparsuaan

daan kanon dagiti Lumad iti tawidda a daga.

Iti agtigtigerger nga imam, yawatmi ti AK47

kukuam nga itag-ay

no pugsatem ti pammati iti kadagupanmi a naipatli

dikamto maturog nupay naudatalkamin

ta dinto makatalna dagiti busbusi

nga agsala iti gayebgeb ti agmatuon

ditoy Libingan ng mga Bayani.

--NOLI S. DUMLAO

Paoay, Ilocos Norte / Parañaque City

(Naipablaak iti Bannawag, Nobiembre 7, 2011 a bilang.)

Iti Bito Dagiti Mito

Manmanot’ tinapik ni Aglipay, inikkanna iti anib

A pudno met a nagbaklay, an-annong ti sipnget

Bimmuyogka iti inam adu ken napalalo nga ibit

Inkarim, “Iti tunggal tedted ti lua, natan-ok a balligi ti maapit!”

Wen, daydi anib, nagtibnokan ibit ken an-annong

Pagilian nagudua’t bumusbusor, kumankanunong

Dinillawda dagiti pasdek, utang a sikat’ akingapuanan

Ngem agingga ita, di malibak a pagnumnumaran.

North, South, Coastal a kinalsadam, patayokendan ti toll

Reclamation, nadillaw ngem inda met pagbaknangan

Adu a dekreto a kunada a mangilupit, dida met inikkat

Ganasenda nga ipakpakat, no adda makiddisda a pirak.

Siak, taga-Amianan, ituloyko a kalien

Bito dagiti mito innak pagubbogen

Di maminggat’ saludsod: apay a ni Aglipay

Iti kinaubingmo, inanibannakan?

--NOLI S. DUMLAO

Paoay, Ilocos Norte / Paranaque City

(Naipablaak iti Bannawag, Septiembre 24, 2012 a bilang.)

Padapadakam'

(Pinili, Ilocos Norte version)

Padapadakam' a siraragsak/ A kumablaaw mangipaduyakyak/ Ta nagtengan ti aldaw a pannakayanak/ Ni (nagan ti agkasangay) a napnuan gasat.

Balangat a naurnos dagiti sabsabong/ Nga umaymi kenka isaad dita ulom (adda mapan mangisaad iti korona iti agkasangay)/ Kasta met a yawatmi kenka/ 'Toy naindayawan unay a palma (adda mangyawat iti palma wenno sabsabong iti agkasangay).

Sapay iti Dios ta ilayonna koma/ 'Ta salun-atmo, biag ken regta/Ken 'ta pintasmo a nagpaiduma/ Nga ap-apalan dagiti kas kenka.