Pasugnod

Agtutuglep dagiti ima ti pagorasan.

Agsainnek rupa iti kalendario

a malapgis ken maiwalin.

Uloden payen dagiti aldaw dagiti sakana

agkakapsuten dagiti angep a marunaw

a mangdiram-os koma kadagiti barsanga

a nangkumot iti agbirbirri a daga.

Agkurkuridemdem a sumirip ‘diay bulan,

agur-urok ti sipnget ket di makaturog ti rabii.

Kibkibinen ti nalitem nga ulep 'diay init

dagiti rayana kawkawikawenen ti langeb.

Aglaladut ti pul-oy a mangap-apros

kadagiti masetas iti minuyongan.

Manguddakudday ti payakpak

dagiti kulibangbang a mangag-agek

kadagiti nalaylayen a sabong

a naparkaganen iti sam-it; nagulimeken

dagiti naarimbangaw nga alimbubuyog.

Ballikid a ballikid dagiti mailiw a pungan

A danggayan pitik ti pagorasan iti diding

makuerdasan koma manen

kadagiti nalailo nga arasaasmo.

Kumraang, mauksob ti ukis dagiti kayo,

dimo kad’ ipalubos a mairaman a malkab

ti arakup ken areng-engmo.

Dimon urayen a kibinen ida dagiti naregreg

a bulong ket mairamandan nga agrupsa

iti daga a nangikur-itak iti naganmo.

--MARICHEL E. SUGUITAN

Solano, Nueva VIzcaya / Hong Kong

(Naipablaak iti Bannawag, Oktubre 22, 2012 a bilang.)

Parbangon

Segseggaanka iti tunggal parbangon

ngem karasakas laeng dagiti bulbulong

ti mangngegak; awan uni ti tekka iti bautek

kadagitoy pingping, umagibas ti pul-oy a di met agdisso

dagiti apros, agtalinaedda a nakabitin iti angin.

Nakasirip ti raya ti init iti regkang dagiti tinidtid a diding

sabatek ti lamolamo a barana

saklotek nga aprosan ken arakupen

isapsapok ti lawagna iti sibubukel a pakabuklak

Ngem mautoyanak a mangpalabas iti agmalem

ket seggaak ti idadateng ti sumipnget

Kas kaniak, maragsakan dagiti andidit ken kuriat

a kibinen dagiti aggilgilap a bituen

ket kas kadagiti napalabas a rabii,

palubosannak latta koma a sumangbay kenka,

uray siuulimek, iti sidong ni lagip

agingga a dika dumteng iti parbangon.

--MARICHEL E. SUGUITAN

Hong Kong / Solano, Nueva Vizcaya

(Naipablaak iti Bannawag, Hulio 30, 2012 a bilang.)