Lovingly Yours, Marie

“ISEM, isem, umisemka man, biagko/ Ta isemmo isu’t mangay-ayo/ Daytoy pusok a napnuan ‘ti limdo.”

Ne, kitaem ket kimmantaka, ‘bagis. Di ketdin ta nakalatlatak dayta a kanta? Mapanka iti uray ania nga okasion iti Kailokanuan, kasar, buniag, piesta, adda ta adda “Isem” a mangngegam.

Ta malaksid a nagmayat a lung-ayan ken pudno a makaisem ti liriko ti kanta, makaawis ti timek ni Marie Prieto nga akinkanta iti daytoy.

Ngem ammom kadi, ‘bagis, a sumagmamanon a tawen nga adda sadiay Taiwan ni Marie?

Natalinaay nga agbibiag kaduana ti Taiwanese a lakayna ken tallo a bungada.

*     *     *

Ngem kas pudpudno a managayat iti musika, dina maliklikan ti awis daytoy.

Agingga a dimmatag manen (ti musika) babaen ken ni Vhen Bautista, ti Prince of Ilocano Song.

Babaen ti Facebook, nagkinnomusta dagitoy agpagayam. Agingga a napagnumuanda ti mangbukel iti maysa nga album.

Suraten ni Marie dagiti liriko, ikkan ni Vhen iti melodiana

Agingga a naipasngay ti “Lovingly Yours, Marie,” ti back-to-back album da Marie ken Vhen.

*     *     *

Buklen ti nasao nga album ti sangapulo ket maysa nga orihinal a kanta kas kadagiti sumaganad:

“Yawatko Kenka,” “Wo Ai Ni,” “No Ammom La Koma,” “No Bilang Ta Sikanto ‘Tay Agriro,” “Ammok a Biddut,” “Kupido, ‘Toy Pusok Na-Bull’s Eye-mo,” “Gumawgawawa Iti Panagsublim,” “Mamatika Kenkuana,” “Sika,” “Video Call,” “Maikadua nga Ayat,” “Marie,” “Musika, Sapsapulenka Latta,” “Iliwko Nalaus Unay,” “Ilik A Badoc,” “Kasano A Lipatenka,” “Lovingly Yours” ken “Naisangsangayanka a Bukel.”

*     *     *

Pagimasanna iti daytoy nga album, ‘bagis, saan laeng a nagtinnulongan da Marie ken Vhen a buklen.

Nangidiaya met iti tulong dagiti papagayamda a mannurat nga agaramid iti liriko a kas kada Alvin John Fengers (Alvin Dalere), Imelda Duque Toledo, Imelda Batara Alibuyog, Victorino Marquez, Rudy Ram. Rumbaoa, Alexander Rafanan Yago, Alexander Barut, ken Ariel S. Tabag.

Kasta met a timmulong ni Israel Allen Pascua. Isu ti nangtokar ken nangurnos kadagiti amin a kanta.

*     *     *

Kuna ni Marie, ‘bagis, kaaduan a kanta iti album, nairanta a naputar para kenkuana.

Kaaduan a pakasaritaan ti ayat ken biagna kas naasawaan ken Ilokana nga adda iti adayo a lugar.

*     *     *

Iti met biang ni Vhen Bautista, agtultuloy latta ti pannakitinnulongna kadagiti mannurat, musiko ken kumakanta nga Ilokano tapno agtultuloy ti pannakaputar ti Musika Ilokana.

Mabalin ngarud nga ibaga a daytoy “Lovingly Yours, Marie” ket album a mangipaneknek a ti musika latta ti pagsarakan dagiti musiko nga Ilokano, nga iti daytoy a biang da Marie ken Vhen, agpadan nga adda iti abrod, ngem gapu iti Musika Ilokana, adda agsapsapul ken adda nasapulan.

Tapno, kas iti kunada, agtultuloy ti musika…—O


(Naipablaak iti Bannawag, "Di Pay Naluto Naibusen" a kolum ni Angelo Padua iti Pebrero 11, 2013 a bilang.)

Ni Sedric ti Baro a Bituen, ‘Bagis!

Ti akkub ti album ni Sedric

ADDA baro a bituen iti lubong ti Musika Ilokana!

Dayta man ti iny-e-mail ni mannurat Delfin P. Dumayas, ‘bagis.

Ket maysa kano pay nga ubing nga agtawen laeng iti walo. Isu ni Sedric Lacar Cansancio.

Segun ken ni ‘Bagis Delfin, ‘bagis, inistoria dagiti dadakkel ni Sedric a da Sanny ken Emelyne, dua a tawen laeng ni Sedric, naayaten nga agkantakanta. Gagangay iti ubing, saan a nalawag ken beddabedal. Ay ngem maitugotanen nga adda pangabil ti timekna.

No tallo ti tawen ni Billy Crawford idi madlawda a talentado nga agkanta, ni Sedric, dua a tawenna laeng.

Agasem!

*    *    *

Idi simreken iti eskuela, masansanen nga agkanta ni Sedric— awan ti pasken a lumabas a di agkanta. Banag a pakaay-aywan dagiti mamaestrana iti Catterpilar Center for Early Learner, Inc,. iti Siudad ti Laoag, a da Fe Ramos ken Pamela Ramos.

Ni Sedric, ‘bagis, ti superstar iti eskuelana!

*    *    *

Ket ti simmaruno?

Addan album ni Sedric, ‘bagis.

Napauluan iti “Dagiti Pakasaritaan a Naikanta,” buklen daytoy ti sangapulo ket siam a kanta.

Dagitoyda man: “Balasang nga Ilokana,” “Rag-o ni Karayo,” “Biag ni Hawayano,” “Nanang ken Tatang,” “Lua iti Tapok,” “Idol Ko si Kap,” “In Love,” Sadiay Hawaii,” “Umuna ken Maudi,” “Sakada,” “Welkam, Balikbayan,” “Kaanonto,” “Magpakailanman,” “Kalapaw iti Tapao,” “Maasika,” “Ina,” “Dua a Banag,” “Aramid ti Lalaki,” ken “Pagudpud.”

Aysus, no siak idi agtawen iti walo, ‘bagis, uray ta paulona pay laeng, diakon maikabesa.

Ngem no ni Sedric, ay, saluyotenna, a!

*    *    *

Naidumduma pay daytoy umuna nga album ni Sedric, ‘bagis.

Wen, a, ta kakaduana dagiti agkakalaing a kumakanta a kas kada Vhen Bautista, Joanne Domingo, Eden Abarra, Rachelle Mamaclay ken Noel Navarette.

Ket amin dagitoy, agrukbab iti kabaelan ni Sedric!

*    *    *

Garantisado met ti kalidad dagiti kanta ni Sedric, bagis.

Ta dagiti mabigbig a kompositor nga Ilokano dagiti nangipaay iti putarda a kas kada Benny Ventura, Bonnie Manuel, Sonny Dancel, Ericson Paulo ken Joyven Sison.

Saan met a nagpamayan a simmaranay da Flor Martinez ken Ernie Bautista iti Hawaii.

Wen, addan iti Hawaii ti rimat ti bituen ni Sedric, ‘bagis!

Saan ngarud a bumasol ni ‘Bagis Delfin iti kunana nga addan baro a bituen iti lubong ti musika Ilokana.

Kablaawandaka, Sedric!—O

(Naipablaak iti Bannawag, Disiembre 3, 2012 a bilang, iti seksion a Showbiz, "Di Pay Naluto, Naibusen" a kolum ni Angelo "Eloy" Padua.) 

Naim-imas ti Marunggay No Maal-alaan

Naim-imas ti marunggay no maal-alaan

Bulongna ti umub-ubing no mapapaadan

Sumam-it a kas 'ti isem nalasbang a balasang

Uray digonat' di malangoy ti agabalayan

Napas-eng ti marunggay a di magatgatudan

Iti bangkag puonna awan makaassibay

Mulat' Manang Baak agdannat' nakaliktad

Taraken ti Manong Bayog ayatnat' nagatad

Naim-imas ti marunggay no maal-alaan

Puonnat' di naremmengan, bunganat' masukdal

Nananam kas tubbog susot' agdalagan

Sustansianat' balon ti agarado, agpalpal

Nakulbet ti marunggay a di magatgatudan

Bulongnat' barrakabak, binalayan ti aplat

Digonat' naangseg, bungana pay makaulaw

Maganggango, matintinnag, di pay mataltaliaw

Naim-imas ti marunggay no maal-alaan...

--CLES B. RAMBAUD

Pinili, Ilocos Norte


(Naadaw iti basirepublic.blogspot.com. Naipablaak iti Bannawag idi 2002. Adda iti baba ti video ti panangikanta 'toy numo a nangputar met laeng iti melodiana. Pasensiaanyo la bassiten ti kuankuansit a timek.)

Agrimrimaten ti “Saniata” ni Maestro Alex

ITI man Kailokuan wenno iti Tanap, ken iti Hawaii, agal-allangoganen, ‘bagis, ti kanta a “Saniata” ni Alexander Reyes Barut, wenno am-ammo a kas Maestro Alex.

Manipud daytoy iti albumna a “For Adults Only” a pinutar da Prince of Ilocano Songs Vhen Bautista (melodia) ken mannaniw iti Bannawag Rudy Rumbaoa (liriko).

Wen, ‘bagis, sangkapatokar da Benny Guiang Rieta (Kompletos Rekados, KPHI – Honolulu), Edna Butay (Edna's Afternoon Delight, KND – Honolulu), Rey Boboy P. Patao (Linglingay ti Sardam, KNUI – Maui), Edwin Ermitanio (Bangon Kabarangayan, DWRS Commando Radio – Vigan), Freddie Boy Tan (Rimat Dagiti Bituen, DWRS – Vigan), Sonny Dancel (Johnny Tango 3rd Generation,   DZJC – Laoag), Jay Ar Oallesma (Biag Iti Hawaii ken Sonata ti Kailokuan, KPHI – Honolulu), Eliseo Collado (Bombo Gitara, Bombo Radyo-Tuguegarao) ken Ruben Ballesteros (Kiddaw ken Sagut, DZNL-La Union).

*     *     *

Saan met nga adayo iti “Saniata” ti “Apay,” ‘bagis.

Aginaldaw met laeng a maipatpatayab kadagiti nasao nga estasion.

Para ken ni Carlos Pucan, Jr. a chairman ti Lucky 7 - Association of Ilocanos, ti gunglo a mangsupsuporta kadagiti announcer ken singer iti radio, daytoy ti kasudian kadagiti kanta ni Maestro Alex.

Kuna ni ‘Bagis Carlos a daytoy ti pakariknaam iti lamuyot ti timek ni Maestro Alex a maibagay la unay iti lirika ken melodia ti kanta.

*     *     *

Karaman met iti nasao nga album dagiti kanta nga “Ayat ti Maysa a Baro,” “Rakrak a Rikna,” “For Adults Only,” “Ayat nga Awan Duadua,” “Sabong iti Facebook” ken “Biagmi Ditoy Away.”

Maipagpannakkel ti kinapintek dagiti liriko, ‘bagis, ta dagiti mannaniw iti Bannawag dagiti lirisista a kas kada Ariel S. Tabag nga editor a mismo ti Showbiz section, Joel B. Manuel, Roy V. Aragon, Jonathan B. Torricer, Derick Marcel F. Yabes, Vilmer V. Viloria, Nepo T. Benitez, ken dadduma pay a kuna ni Maestro Alex, kas suporta kenkuana dagiti gagayyemna a mannaniw.

Kaaduan kadagitoy ti melodia ni Idol Vhen Bautista, ken sumagmamano ti pinutar met ni Maestro Alex mismo. Ni met Israel Allen Pascua ti nangurnos iti sibubukel nga album.

Iwarwaras met ti Rosa Records nga imatonan ni Rosa Lao.

*     *     *

Wen, husto ta atapmo. ‘bagis, titser wenno mangisursuro ni Maestro Alex. Mangisursuro iti maysa a hayskul iti Texas.

Ngem nasiputan ni Idol Vhen ti talentona iti musika ken panagkanta.

Masansan ngamin a maawis ni Maestro Alex kadagiti pagdadayaan a pagkankantaanna.

Ket ‘tay kunadan, the rest is history.

Kas pammaneknek ti panag-hit ti “Saniata” ken “Apay,” maysan a naan-anay a kumakanta nga Ilokano ni Maestro Alex.—O

(Naipablaak iti Bannawag, Oktubre 22, 2012 a bilang iti kolum ni Angelo "Eloy" Padua a "Di Pay Naluto, Naibusen.

Maysa aldaw kalpasan ti pannakaipaskilna daytoy, immaydak sinalangad da Angkol Alex, Idol Vhen ken Manong Rudy. A ti "Saniata" ket musika ken liriko ni Mg Rudy Ram. Rumbaoa idinto ta kadueto ni Angkol Alex ni Idol Vhen iti nasao a kanta. Nupay ni Apo Padua ti nangsurat iti kolum, akuek ti panagkamali, apo, ta datao ti napusgan a mangedit iti showbiz section ti Bannawag. Sori kadagiti tallo a maseknan ken dagiti minilmilion a fans-da. )

Padapadakam'

(Pinili, Ilocos Norte version)

Padapadakam' a siraragsak/ A kumablaaw mangipaduyakyak/ Ta nagtengan ti aldaw a pannakayanak/ Ni (nagan ti agkasangay) a napnuan gasat.

Balangat a naurnos dagiti sabsabong/ Nga umaymi kenka isaad dita ulom (adda mapan mangisaad iti korona iti agkasangay)/ Kasta met a yawatmi kenka/ 'Toy naindayawan unay a palma (adda mangyawat iti palma wenno sabsabong iti agkasangay).

Sapay iti Dios ta ilayonna koma/ 'Ta salun-atmo, biag ken regta/Ken 'ta pintasmo a nagpaiduma/ Nga ap-apalan dagiti kas kenka.

Kasla Hot Bibingka ti Album ni Eugene, ‘Bagis!

PABASOLENDA ti supermoon, ‘bagis, kadagiti apa dagiti artista itay kallabes.

Napudot kano ngamin ti ulo ti tao.

Kakaasi met ni Apo Bulan.

*     *     *

Asinoda ngamin a nagaapa?

Indarum ni Amalia Fuentes ni Ruffa Gutierrez gapu iti maatap a nasasakit a balikas ni Ruffa iti Twitter.

Nakabkabil ni Albie Casiño, daytay agat-sinuso a maatap a nakaputot ken ni Andi Eigenmann— agyaman kadagiti barkadana a lallaki.

Nakikabil no di man nakigabbo ni Mon Tulfo kada agassawa a Raymart Santiago ken Claudine Barreto.

Mariakosep.

*     *     *

Sabagay, saan metten a baro kadatayo dagiti agaapa a celebrity.

Ti laeng baro, naalaan iti bideo ti apa da Raymart.

Isu a no pelikula koma, nag-hit iti takilia.

*     *     *

Naipausonto met ti “Pinoy Big Brother” ken dagiti sex scandals ken ti impeachment ni Chief Justice Corona.

Nairuamen dagiti Pinoy iti reality show.

Sapay aksion ti bideo da Raymart, hit na hit, a kunada.

*     *     *

Ala, sapay koma laeng ta maisupadi iti aksion a pelikula ti ending ti apa da Raymart ken Tulfo.

Ketdi, maipada koma iti drama a love story.

Happy ending.

*     *     *

Kabayatanna, bay-anta man pay laeng dagitoy Tagalog nga artista, ‘bagis.

Pagpatanganta man ketdi dagiti maipagpannakkeltayo nga Ilokano.

Ni Eugene Marquez?

Wen, daytay ubing a singer iti Hawaii a nangabak a kas Pinoy Power Idol.

Madakamatko man kenka a daydi sangaribu a kopia ti albumna a nayalnag idi Nobiembre 26, itay napan a tawen, naibusen, ‘bagis.

Kadatayo nga Ilokano, kasla naimas a bibingka a nagiinnagawanda.

*     *    *

Ngem saanka nga agdanag, ‘bagis, kasta met dagitay kakabagianta idiay Ilokos.

Ta itay kallabes a Semana Santa, nagiwaras metten ti Golden Music Arts Records and Tapes ken Rosa Records iti sabali pay a sangaribu a kopia.

Ket kasla man metten bibingka a pagiinnagawanda kadagiti record outlets iti Filipinas.

Siempre, saan a pakadanagan dagiti kakabagian. Ta saan la ketdi a maibusan ti kopia ti Escueta Commercial iti Laoag City.

Ni Eugene bayat ti panagkantana iti pannakayalnag ti albumna a naigiddan iti pannakarambak ti panagkasangayna.

Ni Eugene bayat ti panangpirmana iti kopia ti albumna.

(Naipablaak iti Bannawag, Mayo 21, 2012 a bilang iti kolum ni Angelo "Eloy" Padua a "Di Pay Naluto, Naibusen.")

Makalinglingay ti “For Adults Only” ni Maestro Alex, ‘Bagis

Ti akkub ti album ni Alexander Reyes Barut.

ADDA sayangguseng, ‘bagis, a masikog ni Marian Rivera.

Adda ngamin dagitay nakangngeg a kinablaawanda ni Dingdong Dantes.

Mano a bulanen? sinaludsodda pay

Nagyaman kano met ti aktor.

Kano, a, ta sayangguseng la ket ngarud.

*     *    *

Malagipmi nga idi apagtapog daytoy a tawen, adda nangipalad nga agsikog ni Marian.

Diak la nasaludsod, ‘bagis, no tsismosa met daytoy a mammalad.

*     *    *

Mangnamnama met ni Phil Younghusband nga agkatuloyanda ken Angel Locins, ‘bagis.

Nasuerteda kano iti tunggal maysa.

Wen ta iti daytoy Marso, agpadada a nakaawat iti pammadayaw, ni Angel kas atres idinto a kas umaayam iti futbol ken ni Phil.

Kayatna a sawen, kayat ni Phil nga agtultuloy ti suertena.

*     *    *

Agap-apa da Cristine Reyes ken Ara Mina nga agkabsat, ‘bagis.

Saan a nakakaskasdaaw daytoy.

Agpadada met nga adun dagiti nakaapada iti napalpalabas.

Nalabit, awan ti sabali a mangpatol kadakuada.

*     *    *

Ti nakaay-ayat iti daytoy nga apa, naammuan ti publiko a nobio ni Ara ni Mayor Patrick Meneses.

Mayor Patrick Menese, who, kunam, ‘bagis?

Ket daytay dati a nobio ni Aiko Melendez.

Ayanna ti nakaay-ayat?

Ket ti dati a kabbalay ni Aiko a ni Jomari Yllana, nagbalin met a nobio ni Ara.

O, di nakaay-ayat?

*     *    *

Hm, mapantayo man met iti makalinglingay.

Nakaiggemakon, ‘bagis, iti “For Adults Only” nga album ni Maestro Alexander Reyes Barut.

Isuna daytay maestro a singer a tubo iti Vintar, Ilocos Norte ngem mangisursuro ken agnaeden iti Texas, USA.

Makaabbukay man iti rikna , ‘bagis, ti sangapulo ket pito a kantana a pasig a pinartuat ni Idol Vhen Bautista.

Sapay naglalamuyot dagiti balikas a pinartuat met dagiti mannaniw nga Ilokano.

Adda ballad, adda balse, adda daytay mangpakuyegyeg iti saka, adda kanta para iti agpaspasidumri, adda kanta para iti inlab.

Ken ipasiguradok,’ bagis, saan laeng a para kadagiti nataengan daytoy a “For Adults Only.” (ANGELO "ELOY" PADUA)

(Naipablaak iti Bannawag, Mayo 7, 2012 a bilang iti kolum ti autor a "Di Pay Naluto, Naibusen". Para kadagiti interesado a maaddaan iti kopia ti “For Adults Only,” agorder iti Facebook page ti nasao nga album [facebook.com/paraitinataengan] wenno agteks iti 0918-682-6330.—AST)

Agrimrimat Latta ni Idol Vhen Bautista

TI sumaganad ti kolum ni Kabagis Angelo "Eloy" Padua, presidente ti FAMAS, iti Bannawag a napauluan "Di Pay Naluto, Naibusen" iti seksion ti Showbiz nga ed-editen daytoy numo.

Nakaay-ayat a maammuan nga agtultuloy latta ti panagkankanta ken panagpartuat iti kanta ni Apo Vhen Bautista, ti ibilang ti kaaduan a Prince of Ilocano Songs (panagkunak, sumagmamano pay a tawen, mabalinen nga awagan iti "Ari Dagiti Kanta nga Ilokano"). Iti laksid nga adda iti abrod ken adda met iti agduduma a nasion dagiti masansan a kabinnuligna kadagiti proyektona. Ta malaksid iti panagpartuatna iti kanta a kantaenna mismo, agparpartuat pay iti kankanta para kadagiti nadumaduma a singer nga Ilokano. Ken siempre, masansan nga isu ti prodiuser.

Dagiti kas kada Apo Vhen ti umadu koma pay. Tapno ti kantan ni Ilokano, agtultuloy ti panagallangogangna iti sangalubongan.

Kabayatanna, adtoy ti kolum ni Kabagis Eloy:

Ni Vhen Bautista iti pannakaipaay
kenkuana ti 2011 GAWAD Amerika.

Agtultuloy ti Panagrimat ni Idol Vhen!

IMPADAMAG man ni ‘Bagis Eliseo B. Contillo nga adda manen award ni Prince of Ilocano Songs a ni Vhen Bautista. Binigbig ti 10th Annual GAWAD Amerika idiay Los Angeles itay Nobiembre 2011 ni Vhen a kas "Prinsipe Dagiti Kankanta nga Iluko."

Gapu daytoy iti awan sarday a panangitandudona iti musika dagiti Filipino (am-ammo a kas Chino Romero kadagiti kantana iti Tagalog) nangruna ni Ilokano iti America ken dadduma pay a paset ti lubong a pakadanonan dagiti albumna.

Kasano ti katan-okna daytoy GAWAD Amerika, ‘bagis?

Dagitoy man ti kakadua ni Idol Vhen a napadayawan: Dip. Manny Pacquiao, Sen. Nene Pimentel,

Direk Wenn Deramas, Beauty Queen Venus Raj, ken dadduma pay a nalatak a personalidad.

* * *

Tinawen a maipapaay, daytoy GAWAD Amerika, ‘bagis, ti grupo dagiti mangbigbigbig iti talento dagiti Pinoy iti sangalubongan nangruna iti tay-ak ti musika, isport, pelikula, negosio, ken politika.

Ket daytoy ti nakaay-ayat, ‘bagis: Iti panagpilpili ti nasao a grupo iti theme song, ti kanta ni Idol Vhen ti napilida.

* * *

Malaksid iti nasao nga award, sabali laeng met ti inted ti Kultura ti Amianan, Inc. nga idauluan ni ‘Bagis Angel Calso, dati a mannurat iti Bannawag, itoy Marso 17, 2012 iti naangay a programa iti Manila Hotel.

Nabigbig ni Idol Vhen a kas kangrunaan a mangitagtag-ay iti kultura ti Ilokandia babaen kadagiti adu a kantana ken kas "Prince of Ilocano Songs."

Asino met dagiti kakaduana a napadayawan ditoy, ‘bagis?

Da Freddie Aguilar, Joel Macanaya ti Rainmakers, ken dadduma pay nga Ilokano a kumakanta.

* * *

Kabayatanna, kuna met ni laeng ni ‘Bagis Rudy (awagmi ken ni ‘Bagis Eliseo) nga awan sarday ti panagkonsierto ni Idol Vhen iti US ken Canada.

Nabiit pay, inawis ni Manny Calura (i-Narvacan, I.S. ngem agnaeden idiay Edmonton, Canada) nga agkonsierto iti Alberta. Kadua ni Idol Vhen a nagkanta da Keanu Ven, Mikaela Vien Canto Bautista, ken Rema Canto Zoleta.

Agtultuloy met ti panagaramidna iti album. Kaudian ti “Homesick Versus Dollar” a nagkaduaanda ken Noraline Domingo. Naipalaon iti nasao nga album ti 19 a kansion a para kadagiti OFWs nga inyalnag ti Rosa Records babaen ken ni Rosa D. Lao ken timmulongan nga improdius da Carlos & Pat Pucan, Jesse ken Norma Santos, Rizal ken Frances Cajimat, Ben ken Flora Sacro, Florida Isla, Bobot ken Edna Butay, Mel ken Sylvia Gonzales, Benny ken Nora Rieta ken Alex Barut.

* * *

Agtultuloy met ti mini concert ni Idol Vhen kadagiti nadumaduma a radio stations iti Hawaii ken Filipinas a kas iti “Linglingay iti Sardam” iti KNUI iti Maui a programa ni Boboy Patao, “Edna's Afternoon Delight Honolulu” babaen ken ni Edna Butay, “Rimat Dagiti Bituen” babaen ken ni Freddie Boy Tan iti DWRS, “Kiddaw ken Sagut” iti DZNL babaen ken ni Ruben Ballesteros, ken iti “Radyo Natin” Candon FM station babaen ti DJ Vhen & Kidz Muzic Live.

Malaksid itoy, ‘bagis, adda pay maysa nga oras nga edition ni Idol Vhen iti Iluko.com babaen ken ni Webmaster Andy Barroga.

Dakulapendaka iti nairut, Idol Vhen!—O

(Naipablaak iti Bannawag, Marso 26, 2012 a bilang.)

Ni Alexander Reyes Barut Kas Kumakanta

NAAM-AMMOK ni Apo Alexander Reyes Barut iti Facebook, kas maysa a mannaniw. No diak mariro, nagsagangkami iti maysa a thread a ti patangan ket sex. Kalpasanna, nangidatag iti daniw a para Bannawag a ti subject-na ket sex, sa kalpasanna nangidatag iti daniw para iti proyekto a libro a napauluan "Alimpatok," ti antolohia dagiti erotiko a daniw dagiti Ilokano.

Idi kuan, nagumbi iti maysa a lyrics ti kanta a paaramidanna kano iti melodiana ken ni Apo Vhen Bautista. Gapu ta Vhen Bautista, kunana, dagus a nayatak ken pinagpilik pay ketdin no adda makursonadaanna a daniw a mabalin a ragasen a kanta iti blog-ko (pakarsoniasseng.blogspot.com).

Dina nadakdakamat a ti paulo ti album nga isagsagana a "For Adults Only." Ta no nadakamatna koma, inyaramidak koma iti erotiko a lyrics. Ngem blessing in disguise ta daydiay napilina a daniw a nagbalinen a kanta a napauluan iti "Apay," sangkasaona nga adu kano ti makagusto.

Manipud iti simple a panagam-ammo iti FB, nagtalek metten ni Angkol Alex (awagko kenkuana) kaniak ket kunana pay ketdin nga italekna kaniak ti sumagmamano a kopia ti albumna nga ilakok ditoy Filipinas. Ket kas maysa a cowboy a nakasagana para iti ania man a panagdur-as ti musika dagiti Ilokano.

Nakaay-ayat daytoy nga album ni Angkol Alex ta napagsuratna iti lyrics dagiti pamiliar a nagan iti Daniw Ilokano a kas kada Roy V. Aragon, Jonathan Torricer, Derick Marcel Yabes, Rudy Rumbaoa, ken dadduma pay. Sabali la nga agpayso no ti puonan ket panagpapagayam ken panagkakadua.

Ti maysa laeng a singasingko, no bilang itultuloy ni Angkol Alex ti career-na kas pudpudno a singer, ALEXANDER lattan ti naganna kas singer. Kasla koma ngay ni CHARICE a charice lattan, hehehe.

Ay wen, gayam, maysa a maestro ni Angkol Alex-- statistician, wenno nalaing iti Math. Mannaniw ken no maikkan iti gundaway, amangan no nalaing a mannurat iti sarita a makapakatawa.

Adtoy man ti maipanggep ken ni Angkol Alex a naipablaak iti kolum ni Kabagis Angelo "Eloy" Padua a "Di Pay Naluto, Naibusen" iti Pebrero 20, 2012 a bilang ti Bannawag:

Ni Maestro Alex bayat ti panaginanana
kalpasan ti panagirekordna iti kanta.

Tawayam Man Daytoy “For Adults Only” ni Maestro Alex, ‘Bagis!

WEN, isu dayta ti baro nga album dagiti kankanta nga Ilokano, ‘bagis.

Ti singer?

Ni Maestro Alexander Reyes Barut— Maestro Alex, for short.

Saan a gapu ta “short” kano.

Ketdi, tapno natartarus.

* * *

Maestro ngamin ti propesion ni Maestro Alex, ‘bagis.

Tubo iti Vintar, Ilocos Norte ken nadumaduma a pagadalan iti nasao a probinsia ti nagisuruanna.

Nagbalin pay ketdi a provincial statistician. Agingga nga indanon ti kina-statistician-na iti National Statistics Office.

Idinto a ti kinamaestrona, isu ti nangidanon kenkuana idiay Jefferson High School, Jefferson, Texas, USA a pangisursuruanna iti agdama.

* * *

Idinto a ti kinamannakigayyemna, isu ti nangidanon kenkuana iti Facebook nga isu met ti nakatakuatan dagiti gagayyemna iti talentona iti panagdaniw (mannaniw met isuna iti Bannawag), ken iti panagkanta.

Agingga nga adda nangikari a mangaramid iti lyrics.

Adda nangikari a mangaramid iti melodia.

Adda nangikari a maki-duet (saan met siguro nga awan talekda iti pintas ti timekna).

Adda nangikari nga agbalin nga arranger.

Adda nangikari a mangiprodius.

Ket nabukel, ‘bagis, daytoy “For Adults Only” ni Maestro Alex.

* * *

Iti ababa a pannao, ad-adda a panaggagayyem dagiti Ilokano artists ken musicians ti nagpuonan daytoy nga album, ‘bagis.

Asino met dagitoy a gagayyem ni Maestro Alex?

Dagiti musikero/singer nga Ilokano a kas kada Vhen Bautista, Noraline Domingo, Jerameel Perucho Contreras ken Allen Israel Pascua.

Dagiti mannurat nga Ilokano a kas kada Roy V. Aragon, Jonathan Torricer, Joel B. Manuel, Rudy Ram. Rumbaoa, Derick Marcel F. Yabes, Bert Ugalino,Vilmer Viloria, Remy Piano, Alvin John Dalere, Florencio Bangasan, ken Ariel S. Tabag.

Malagipmo dagita a nagan, aya, ‘bagis? Wen, a, ta mannurat iti Bannawag ti kaaduan kadakuada.

Kuna ngarud ni Maestro Alex, ‘bagis, a dakkel kano ti benepisio ti mannakigayyem.

Mamatiak kenkuana, ‘bagis.

* * *

Buklen ti 19 a kanta, manamnama a mayalnag ti album itoy umuna a kagudua ti tawen.

Nupay kasta, nangiruaren ni Maestro Alex kadagiti “pangramanan” iti YouTube ken iti Facebook.

Ken uray iti radio.

Kuna da Maestro Alex ken Idol Vhen, nga itoy a Pebrero, “tune to watch” kadagiti radio iti Hawaii daytoy “Apay” a maysa kadagiti kanta iti album.

Ania magagarankan a mangtaway iti “For Adults Only,” ‘bagis?

Makigayyemka ngaruden ken ni Maestro Alex iti Facebook. (ANGELO 'ELOY' PADUA)

(Ti Rosa Records, Philippines iti babaen ti Aweng Records Music Production & Distribution, USA,ti prodiuser ti “For Adults Only” nga album. No kayatyo ti maaddaan iti kopia, i-friend ti Alex Reyes Barut iti Facebook sa agorder babaen ti pribado a mensahe.—AST )

Dagitoy man ti sampol ti kanta a maipalaon iti "For Adults Only" nga album

Apay:




Rakrak a Rikna:

Iti Tay-ak ti Musika: Naraniag ti Bituen ni Eugene!

Maaw-awagan ita iti Pinoy Power Idol ni Eugene Tunac Marquez. Naibasar daytoy iti maysa a programa iti Hawaii a nangabakanna. (Nakabase ni Eugene ken ti amana, ni Victorino Marquez) iti Hawaii, ti isla a pagnaedan ti reprep nga Ilokano.)

Adda dagiti mangibagbaga nga isu ti sumaruno a Vhen Bautista ni Eugene. Saan met a diak umanamong ta adda met inalatna daytoy ubing. Ngem nasaysayaat sa no Pinoy Power Idol lattan ti awagtayo kenkuana, tapno saan unay a ma-pressure no maibilang nga isuna ti sumaruno a Vhen Bautista. Ken nawaywaya a mangtakuat no ania met ti kayatna a dana a surotenna iti tay-ak ti musika.

Adtoy man ti kolum ni Angelo 'Eloy' Padua (Di Pay Naluto, Naibusen) iti Bannawag, Nobiembre 7, 2011 a bilang:

KAS impadamagtayo idin ditoy, Kabagis, babaen ken ni Kabagis Leilanie G. Adriano, maysa kadagiti masipsiputan ti bituenna iti tay-ak ti musika nangruna iti America ni Eugene Tunac Marquez.

Ita, adtoy ti sabali a padamag maipanggep ken ni Eugene, kas impadamag met ni Kabagis Eliseo “Rudy” Contillo ti Narvacan, Ilocos Sur.

Kas kuna ni Kabagis Rudy, mairuaren iti mabiit ti umuna a CD album ni Eugene. Napauluan iti “Sagibo iti Amianan” ken iruar ti Sagibo Records.

Gumatangkayo man ketdi, ‘bagis, ta denggenyo man met.

* * *

Naipasngay ni Eugene idi Nobiembre 20, 1999 iti San Pablo, San Nicolas, I.N. kada Victorino Marquez (NA), ken Maggie Margaret Tunac-Marquez a maysa a radio broadcaster ken anaunser. Agnaedda itan idiay Hawaii.

Sangapulona laeng idi mapan idiay Hawaii a kaduana ti amana. Ngem nangrugi nga agduyos nga agkanta idi agtawen iti 5.

Iti edadna ita a 12, adun ti nakisalisalanna iti panagkanta. Kameng pay iti School Drama Club iti Aliamanu a pagadalanda.

* * *

Ni met Eugene ti umuna a kampeon iti Pinoy Power Idol a maisaysayangkat iti Radio Station KPHI iti Honolulu. Kuna ti amana nga idolona da Vhen Bautista ken ni Bruno Mars ket isu ti masansan a tuladenna ti estilona nga agkanta.

* * *

Saan laeng a nalaing nga agkanta ni Eugene, ‘bagis. Masirib pay. Maysa kadagiti kasariritan iti klasena.

Ken napagraemnakami. Wen, ta iti laksid ti kaaddanan iti US, pagaayatna pay laeng ti musika ni Ilokano.

Daytoy ti gapuna (kas kinuna ni Kabagis Rudy) a mismo a ni Vhen Bautista, Prince of Ilocano Songs a nakabase met itan idiay US, ti nangputar iti musika dagiti kanta iti umuna nga albumna ni Eugene nga Ilokano. Ken mismo a ti pagdidinnamagan a musical arranger iti America a ni Pierre Grill ti nangareglo iti accompaniment wenno kompaniarna.

* * *

Ania ngarud ti naidumduma itoy nga, kunam, ‘bagis?

Saan a tradisional ti nga Ilokano songs dagiti linaonna. Kabarbaro iti panagramantayo nga Ilokano. No daniw koma, avant garde. Pierre Grill, kunam man.

* * *

Malaksid ken ni Eugene, maam-ammo met iti nasao nga album da Victor Marquez ken Joebert Tunac Marquez.

Ken nairaman dagiti lyrics ti kanta a pinutar ni Robert de la Cruz a “Bisio” ken ti “Inang” ni Ben Pacris.

Ala, ket ania pay laeng ti ur-urayem, ‘bagis. Tulongantayo man daytoy pada nga Ilokano.

Ta no maitan-ok, maitan-oktayo met amin a Saluyot!—O

Daytoy man ti sampol ti kanta ni Eugene:

Yo, ‘Bagis, T Max in da Haws!

IDI damok a mangngeg ni T Max, kaslaak la ubing a naayatan. Agasem ta kabaelan met gayam dagiti Ilokano ti ag-rap a mabalin a yabay kada Andrew E. ken Francis M.

Kinapudnona, mas bagay ti rap a musika para kadagiti Ilokano-- wenno kadagiti dadduma nga Ilokano.

Ta adda dagiti Ilokano a mas kaykayatda latta daytay kasla aglallallay a musika gapu iti aglawlaw ken kannawidan.

Iti umuna a rason, kas makitatayo ken kas iti sabsabali pay a lugar iti Filipinas, napalawlawan iti baybay ken bambantay ti Ilokandia. Natural ngarud a ti musikana, segun iti uni ti aglawlawna-- agan-anasaas a baybay ken agdaydayyeng a kabambantayan. Iti maikadua a rason, kannawidan, kunak, gapu ta kaaduan nga inna a mas nadungdungngo no aglallay a paturogenna ti anakna ngem ti kasao wenno disiplinaanna ti anakna. Medio harsh pay ketdi ti dadduma nga inna ta kuddotenda pay laeng ti anakda nga aggurigor la ngaruden. Ngem iti un-unegda, masapul a maikkan iti pagnakman ti anakna tapno dinanton uliten dagiti bambanag a nakalaanna ti sakitna. Ket inton awisenen ti ridep ti anakna, aglallay ni Ilokana nga ina ket ditan a rummuar ti kinalailo ken kinadungngona.

Iti biang met dagiti dadduma nga Ilokano wenno amin pay ketdi, ti rap ti musika dagiti nangato-ti-kugtarna, nadadang-as, mamaingel, natangken-butona nga Ilokano. Kas kadagiti Negro a nanipudan daytoy a musika, umisu la unay ti rap kadagiti naandur, dina ammot' sumuko nga Ilokano.

Ket dagitoy, mangngegmo iti musika ni T Max.

Ti nakaay-ayat ken ni T Max, ipagpannakkelna ti kina-Ilokanona. Ket daytoy talento nga adda kenkuana, isu ti us-usarenna a mangitandudo iti kinasiasinona, ken tapno maam-ammo met iti lubong nga adda met gayam natangken a puli a managan Ilokano.

Basaentayo man daytoy kolum ni Angelo "Eloy" Padua a "Di Pay Naluto, Naibusen" iti Showbiz Section ti Bannawag, ti seksion nga iturong daytoy numo, iti bilang ti magasin iti Enero 16, 2012:

Ni T Max a nangipampannakkel
iti kamisetana a namarkaan iti kina-Ilokanona.

NAKANGNGEGKAN iti Ilokano a rap, ‘bagis? Wen, daytay kasla Andrew E. wenno Francis M.

Wen, a, addan Ilokano rap.

Apay, kapuy?

* * *

Ket maysa kadagiti aglatlatak nga Ilokano a rapper ita ni T Max.

No taga-Solano, Nueva Vizcaya a lugar ni T Max ti pagsaludsodam, ay, i-rap-da kenka dagiti kantana nga “Ilokano ‘Atoy,” “Mangantayon,” ken “Danog ni Ilokano.”

* * *

Kinapudnona, nakabase iti London ni T Max, ‘bagis. Ngem sipud pay idi 2001 a panangiruarna iti damo nga album-na, masansan nga agawid iti ilina tapno agkonsierto.

Ken mangangay iti rap contest. Ta saan laeng a rapper isuna.

DJ, promoter wenno manedier, ken prodiuser pay kadagiti ubbing nga Ilocano a rapper.

* * *

Kuna ni T Max, ‘bagis, a 16 aniosna laeng idi nangrugi nga ag-rap. Wadanna kano met ti grupo dagiti rapper a taga-New York a managan iti Gangstarr , ken ti Death Threat a grupo dagiti Pinoy a rapper.

* * *

Itoy a tawen, panggep ni T Max nga iruar ti maikalima nga albumna a kaaduan kadagitoy ti Ilokano a rap.

Adda met latta laokna a Tagalog, a, tapno maipatarna met ti bagbagina kadagiti Tagalog a rapper.

Apay, isuda laengen ti makapag-rap iti Tagalog? Laklakaen ni Ilokano, a.

Saan, T Max?

* * *

Iti saludsod no apay nga Ilokano nga ag-rap, kunana a tapno maitandudo ti lengguahetayo. Ken ti kinaandur ken kinalaing ni Ilokano iti tay-ak ti sangalubongan a musika wenno rap.

Kunana a kayatna nga iparammag ti kinasiglat dagiti Ilokano.

Kunana man ngarud iti kantana nga “Mangantayon”: Nagimasen ti mangan no adu ti sida/ P(in)akbet ni Ilokano, naimas a talaga.”

* * *

Ania, ‘bagis, magagarankan a makangngeg ken ni T Max?

Ket siripemon, a, ‘tay YouTube channel-na a Mhar12.

Ket siguraoak, ‘bagis, pasurotamto ti panag-rap ni T Max iti “Ilokano ‘atoy, saan a kapuykapuy!”--O

Dagitoy man ti sampol ti panagbanat ni T Max ken dagiti kakaduana:

Adayon ti Nagteng ni Ralph!

(Immuna a rimmuar daytoy iti Manipud Kadagiti Editor ti Bannawag a blog ti Editorial ti Bannawag. Gapu ta naipasngay daytoy a blog (Daniw ken Samiweng) a ti kangrunaan a panggepna ket mangitandudo kadagiti daniw ken samiweng dagiti Ilokano, adtoy ngarud nga ipaskiltayo manen ti kolum ni Apo Eloy Padua maipanggep ken ni Ralph Recto Calube a maysa nga ubing a kumakanta a tubo iti Currimao, Ilocos Norte.--AST)

Iti pananginterbiu ni Broadcast Journalist Teresa C. Campos
ti DWPE Radyo ng Bayan Tuguegarao ken ni Ralph Recto O. Calube.
Nairaman iti ladawan ni Broadcast Production Supervisor
Vivian C. De Guzman (kaabay ni Ralph).

DI PAY NALUTO, NAIBUSEN

Ni Angelo 'Eloy' Padua

Adayon ti Nagteng ni Ralph!

ITAY laeng nabiit, ‘bagis, inawis ni Kabagis Jim Domingo ni Ralph Recto Calube nga agpasiar iti Cagayan. Nairana met a semestral vacation ni Ralph isu a nakapasiar iti probinsia.

Malagipmo pay ni Ralph, ‘bagis?

Wen, daydi inestoriak kenka a singing sensation nga ubing iti Ilocos Norte.

Agasem ta maaw-awisen iti kabangibang pay a probinsia.

* * *

Kabayatan ti kaaddana iti probinsia, nagpaay ni Ralph a maysa kadagiti naisangsangayan a bisita iti pannakayalnag ti maysa a programa ti DWPE Radyo ng Bayan Tuguegarao a napauluan iti “Pangrugian a Panagsanay iti Panangidaulo ken Panangimaton Para kadagiti Agtutubo Babaen iti Radio.”

Kadagiti padata a saan a taga-Cagayan. ‘bagis, kuna man ni ‘Bagis Jim a maysa nga estasion ti radio ti DWPE Radyo ng Bayan Tuguegarao nga imatmatonan ti Philippine Broadcasting Service iti Opisina ti Presidente ti Filipinas.

Mangmangngeg ti DWPE kadagiti amin a probinsia ti Tanap ti Cagayan agraman dagiti agnaed iti akindaya a paset ti Cordillera a buklen dagiti probinsia ti Ifugao, Mountain Province, Kalinga ken Apayao.

Agasem ti kaadu dagiti nakangngeg iti timek ni Ralph, ‘bagis?

* * *

Iti daytoy a pannakaipatangatang ti timek ni Ralph, tinukayna ti atension dagiti agdengdengngeg. Adu ti naawis a maaddaanda ti kopia ti CD a naikairekordan dagiti kankantana.

Ay, ket inkalikagum la ket ngarud, ‘bagis, dagiti mangisursuro iti Lasam, Cagayan nga agkanta met ni Ralph iti maysa a pasken a naangay iti Callao, Lasam, Cagayan.

Wen, a. Tapno ipangngegna ti makaguyugoy a timekna.

* * *

Simmursurot ni Ralph Recto iti panagbisita ni Kabagis Jim kadagiti gagayyemna a nagkankankataanna kadagiti nairekord a kantana. No addada iti pagtaengan ni Kabagis Jim, adu dagiti gagayyemna a pimmasiar tapno laeng denggenda ti timek ni Ralph.

Nairaman kadagitoy ti grupo da mannurat met iti Bannawag Laurence Bingayen ken Imelda Perez, Ronnie Perez a naggapu pay iti Lal-lo, mannurat iti Bannawag Pedro Espada, Jr. ken Lorena Espada ti Gattaran, ken Danny Batugal a naggapu pay iti Santo Nino (Faire) a nagitugot kadagiti bukodda a lugan a nagpa-Tuguegarao.

Ket wen, ‘bagis. Tapno makitada laeng a personal ni Ralph Recto.—O

(Interesadoka met a makangngeg iti naisangsangayan a timek ni Ralph, ‘bagis? Teksam man ni ‘Bagis Elizabeth M. Raquel [ti kaarrubatayo a kolumnista ditoy Bannawag] ta agorderka iti CD ni Ralph. Daytoy ti selpon ni ‘Bagis Ely a prodiuser ti album: 0999-992-7179.)

(Naipablaak iti Bannawag, Nobiembre 21, 2011 a bilang)

Daniw ken Samiweng

Kabagis met laeng daytoy dagiti immun-unan a blog ken website nga impatakder/mi ken dagiti pada a mannurat a kas kada Roy V. Aragon ken Mighty C. Rasing-- ti basirepublic.blogspot.com ken ilocanopoetry.net. Adda slash-na daydiay "impatakdermi" gapu ta isuda dagiti admin ket timmulongkami laeng iti pannakainawna iti panunot ken ar-arep-ep.

Ita, inkeddengko ti nangipatakder iti sabali. Wenno nangipasngayak iti kabagisda, kunak, man tapno saan a maisabsabali.

Ta dagiti adda iti ngato, nalawlawa ti masakupanda gapu ta sirsirpatenna ti sibubukel a landscape ti Daniw Ilokano ken Performance Poetry iti Amianan. Nupay dagiti makitayo ditoy, mabalin a makitayo sadiay; ket dagiti makitayo sadiay, makitayo met ditoy.

Daytoy Daniw ken Samiweng (unikenberso.blogspot.com), panggepna ti agbalin a lakasa dagiti agdama a maparpartuat ken mapartuatto a Daniw Ilokano, Musika Ilokana ken Ilokano Performance Poetry. Mabalin a mabasayo ditoy dagiti naipablaaken kadagiti magasin wenno libro, wenno dagiti ibilangtayon a klasiko a Daniw ken Samiweng nga Ilokano.

Kasta met a pamunganayan dagiti maipablaak a libro iti Daniw.

Kasta met a pagsulbodan dagiti baro a kita ti Daniw. Ken Musika. Ken Performance Poetry.

Maysa daytoy nga entablado para kadagiti Ilokano a Mannaniw, Musikero, Performer.

Maysa met daytoy a kamera iti mapaspasamak iti lubong ti daniw ken musika ken performance poetry iti Filipinas ken iti Lubong.

Kangrunaanna, maysa daytoy a personal a rebolusion iti Daniw Ilokano. Iti Musika Ilokana. Iti Performance Poetry.

Ket kadagiti kakadua itoy a rebolusion, kas kadagiti innaganak iti ngato ken dagiti diak pay innaganan, agyamanak iti pannakikammaysayo, Kakadua.

--Ariel S. Tabag*

Enero 20, 2012

*Asseng, kunayo lattan

Image: 'Poetry and Music', marble sculpture by Claude Michel, 1774-1778