Di Mapetpetan

Itay bigat a riniingnaka ni baketmo babaen ti agekna,

nagdayamudomka ta katibnok pay laeng ti panagkukotmo,

ta ti kinasalemsem ti aglawlaw

kumaradap a mangapros kadagiti kudilmo

ngem degdegannaka ti darang dagiti arakupna.

Iti panangitayam iti dakulapmo manipud iti gripo—

tapno ugasam ti tugot ti agpatnag

uray no kasanot’ kainget ti panagdekket dagiti ramaymo,

sumari latta ti danum,

mariknam ti kinaaddana, ti panangdalusna ti rupam,

ngem kigaw, agalus-os a tumipon iti daga.

Ket iti panagtamdagmo iti tawa,

salputen ti sinamar ti ubing pay nga init,

ti rupam, nasaniit iti panagdissona

ngem biagenna ti daram ket pabukarenna ti kaunggam,

ngem uray no petpetam dimonto maiggaman.

Iti iruruarmo tapno sarangtem ti isasangbay ti bigat

kas iti napalpalabas nga aldaw

gagangay a dagiti bulong ti kayo iti arubayan

dida agriri, awanan rikna,

awanan ngiwat nga agtukiad ngem paiturayanda iti angin,

aginiinda tunggal isala ida ti di masirayan a pigsa.

Ket iti sardam, ipulang ti daya ti binulodna

a lawag iti laud ket kagiddan a tumpuar ti ariwanas,

yegda ti pigsa, ti namnama

kadagiti nakaisem a mata, kunaem bagimto ti maysa

a taklin kadagiti agkeppet pay a kirem, wen, petpetam,

ngem kas iti masakbayan, saanmo a maiggaman.

--JAKE F. ILAC

Lasam, Cagayan / Valenzuela, Metro Manila

(Naipablaak iti Bannawag, Enero 16, 2012 a bilang.)