2.21.2012

Panangtubngar iti Lamiis ti Pebrero




Pasgedam
‘ta dalikan. Isaangmo dayta takuri
tapno adda pagdigosmo iti daytoy nalam-ek
nga agsapa ti Pebrero.

Ilukaismo pay
‘ta kortina, tapno sumirip
ti init inton sumingising
madamdama;

sa agsublika ditoy abayko.

Nupay kasla manteka
a timmangken
daytoy rikna ken nakemko,
Arasaas ken aprosmo ti mangriing
kaniak
iti tunggal agsapa—

Wen, malunagak
a kasla manteka.

Nagiddaka manen ditoy abayko
Ibagbagam kaniak dagiti planom
ita nga aldaw, adu ti mapasamak.

Mangngegkot’ taraok ti kawitan
Ket ti dila ni apuy ag-agkannan
ti tengnga
ti dalikan.
Ti danum, pumudot a pumudot

Uray la masinit
dagiti ramayko
iti abagam

Mariknak, mariknak ti bara
ti dandanin agburek
a danum iti takuri.

Iti ngarabna, agbuabo ti kalubna
Agingga nga agkubbuar ti danum

Makitkitak ti rimat ti sumingsingising
nga init manipud kadagiti nagbabaetan
Ti atiddog a buokmo a nanglinged
Iti rupak

Ket ti lam-ek ti Pebrero, nabugtak.

--MIGHTY C. RASING
San Manuel, Isabela / Project 8, Quezon City


(Naipablaak iti Bannawag, Pebrero 20, 2012 a bilang.)

No comments:

Post a Comment