Inabraw

Sarimutmotem ti natedda a manateng iti nasasa nga arubayan. Kalkalpas

ti allawig a nagpagunggan iti agmatuon a kimleb ti init, nagwasangwasang

iti inaladan, inarrabis ti puyot ken sapri dagiti parsa ken darekdek

a pampamnuotan ti naynay la a gumaradugod ken sumanaraaw

a boksit, dumawdawat iti patinayon nga ap-ap ken dengngep.

Iti tangatang, maang-angay ti langeb, nakaparpardas

pay la dagiti ulep, idinto nga aglaladut, malammin pay laeng

ti nakutoran a langit, mangipangpangta iti sagubanit.

A, ngem no awanen ti matudtod ta rinuros aminen ti simmippayot

a didigra, panunotem laengen ‘tay kasalsalumpayakna a marunggay, kassula

a rangaw ti paria, kakkettel a saluyot, kaggabut a labus

a kalunay: abrawem iti lagip, bugguongam iti iliw, sagpawam iti talek.

Sidamto a kalanglangmo ti rikna iti atiddog a lamisaan, iti pangrabii

ti di mabubos a segga, uray siksika laeng a sumango iti grasia, ayabam

‘ta rikna, ‘maykan, manganen, mangantan, mangantayon, ipabpabalaymo

kadi latta, dika kad’ kasla sabsabali, ala, pagsanguan ti adda

a maidasar, pagan-anusan ti adda, paglalak-aman ti grasia.

Imuriam ti bigat kadagiti nasipsip-ak a sanga ken ungkay,

sigpatem dagiti nagtuang a nangbalangan iti ruangan ti inaladan, karaidam

dagiti bulong a naipilet iti napigket pay laeng a pitak. Rimmukma

ti parsa, nabual ti darekdek, pamrayam ti immanges iti nauneg.

Inton mangwaknit ket sumirnaat a sumiripen ti nalukneng

a raya iti baet dagiti arimukamok, rukitemto ti sirok ti daan

parsa ket baliwam nga itukit wenno iwaris dagiti baak

a bin-i. Gupongem met ti kalalainganna a sangsanga

ket inkanto manen iwalawal iti nadam-eg latta

nga arubayan, agur-uray iti kumutukot manen

a ramut, mangiduron iti pangnamnamaan a busel.

Simple laeng met ti ragsak ti nabuniagan iti dinengdeng.

Awan bagyo a makapuros iti lebben a bukel.

Awan allawig a makaparukma iti rumuk-at, rumkuas, nga uggot.

-- ROY V. ARAGON

Dupax del Norte, Nueva Vizcaya / Iguig, Cagayan

(Naipablaak iti Bannawag, Enero 30, 2012 a bilang.)