Agdaldaliasat

adda pilid iti panagurayko iti daytoy nakubong

a lubongko, naatepan a panaginana iti sangkagudua,

sangkapirgis a tagainep. wen, kayatko a guyoden ti oras

tapno makitaka ta iti panagrikep ti sirmatak, adda katawa

iti nagbaetanta a dalan, a panawen, iti kada minuto,

iti kada kanito a pannakailiw, yepyepennak ti nalamiis

a pul-oy ti angin ket agkidemak apagapaman

tapno danggayanka iti panagdaliasatmo, agdaliasatta

kadagiti ulep aglangoyta kadagiti arasaas ti angin,

awisennak ti ridepko iti tengnga ti naktanganen a lubongko,

ngem sapulek latta dagiti garakgak a pagbiagak

tapno mapuotak ti isasangbaymo

ta uray parbangon ita, nasalemsem ket adu ti ubbing

a sumangbay iti daytoy ubing nga aldaw— ubing

a rikna, ubing a namnama,

ubing a regta iti nataengan a panaguray,

ubing ita ti oras kas idi damo a makitaka

wen, ta iti kada pannagna ti sulisog a lipatenka

iti uray apagapaman a pannakalipat ti naganmo,

laglagipenka iti kada isem a sumabat iti pannakairidepko

iti ayug nga itay pay a mangyaw-awis iti pannakailibayko,

tapno ngata nakaridepak iti isasangbaymo

ay, napintas a panunoten, a sirmataen,

kadagiti babaet ti tagari, dagiti katawam,

asidegakon, kunam, asidegakon iti daytoy naatepan a lubongko...

asidegakon, kinunam, asidegakon iti arpad

dagiti nagdanggayanta nga arapaap,

kadagiti nagbuliganta nga anges, iti denna ti napisipisi a turog,

saan a makaturog ti iliw— ti bara, ti dagaang

ti ladawan iti nagdanggayanta a dalan ken kalman, kas ita…

nalamiis ti angin— ngem nabara ti lagipmo tapno riingennak

ket siririingak iti arsadanan ti pannakailibayko…

wen, ta agsubliakto manen iti mabiit, kinunam

—iti lubong a pinanunotko

—iti lubong a pinanunotmo

—iti lubong nga agur-uray iti panagdaliasatta a dua

—iti lubong kalpasan ti  panagurayko.

--GIOVANNI L. PALOMARES

Bacarra, Ilocos Norte

(Naipablaak iti Bannawag, Marso 31, 2008 a bilang.)