Bubon

Sadiay Calipayan, ni Tata Iniong inkuyognak

Ta mapan kan’ makipagbalay iti dayta a bigat

Iti katapokan, sadiayak idi nga agay-ayam

Ngem ti ladawan ti naimas a pangaldaw

Tangkoy a nasagpawan iti dippig a sardinas

Intayabnat’ amin, amin a lagip…

Idiay kabambantayan ti Calipayan

Ni Tata, adda sadiay, maestro karpentero

Sinang-atmi dagiti atitiddog a baetan

A nagdengdenggak sagawisiw ti angin

Ni Tata idi makitanak, ti siddaawna anian

Ngem binuybuyak dagiti perperroka nga agalla-allatiw

Kadagiti sangat’ agbungbunga nga uplas.

Idiay bariomi, ni Nana sapsapulennak

Iti pangngaldaw, addaak laeng idi nga agay-ayam

Insuotnat’ ismagelna a nabarutan

Nagpalaud, nagpadaya, nagpaamianan

Awitnat’ init iti kangitingitan ti aldaw

Barukongna t’ inaponan buteng ken aliaw

Wingiwing ti sungbat adu a saludsodna

Kadagiti masabatna iti dalan.

Sadiay bubon iti talon a di kinunnot ti kalgaw

Tinantan-awannak no addaakon nga agtatapaw

Iti mangliwengliweng a danum…

Ngem, ay, adda met laeng kenkuana nakaipalapayag

A sinurotkot’ anniniwan kayongna a simmang-at

Sadiay adayo, adayo a Calipayan…

Simmangpetkami idi inulsanen ti sipnget

Ti bariomi ket nagmalmalangaak

Ni Nana pinetpetanna dagiti imak

Nairut, kasla damo a makitanak

Kasla dina kayat nga umadayoak

Iti dennana, uray apagdarikmat.

--CLES B. RAMBAUD

Pinili, Ilocos Norte / Novaliches, Quezon City

(Naipablaak iti Bannawag, Abril 16, 2012 a bilang.)