Immallatiw
kadin dagiti piramide ti Ehipto?
Apay
dagiti bunton iti asideg
Awan met
ti maipumpon a paraon?
Ditoy
kadi a maitabon
Dagiti
minuli nga arapaap
Kadagiti
agregreggaayen a turod
Ti
Caroan?
Pasaray
tapliakan ti dalluyon
Ti
namagmaganen a namnamak
Ngem
kasla alibungabong nga agpukaw ti raas
A
mangsirpat iti bannawag
Ta
mermeran dagiti nalukay a darat
‘Toy
malmalpes a matak
Nagturaykan,
sika a baybay!
Gangganatem
metten a yanud
‘Toy
naipasdek a paraiso
Nga apon
dagiti nawaya a sirmata
Maysa a
salindeg ti ili napataudna
Rebbaem
kadi daytoy taeng ti rag-o
Kas ti
panangiwagnesmo
Iti darat
a kastilio?
Kasanon
dagiti tugotko a nagay-ayam iti kadaratan
Kadagiti
adu a malemko iti sabangan?
Mapasungadakto
pay ngata ti agsapa
No
runotemon ti aplaya?
No
palidemen dagita nangisit a turod
Ti
masakbayan dagiti kaipasngay a nagan?
Ay, ‘toy
arasaasko denggem
Dimo
tuangen dagita pantok
A
nakaurnongan adu a dardarepdep…
--ROSELYN
C. CAMPANO
Gonzaga,
Cagayan
(Naipablaak iti Bannawag, Agosto
6, 2012 a bilang. Naadaw ti imahen iti ala a retrato ti autor iti Bgry. Caroan,
Gonzaga, Cagayan kalpasan ti bagyo Lawin.)
No comments:
Post a Comment