Nagangon dagiti bulbulong ngem awan ti
imparipiripmo a panagsublim.
Ania ti nakataktakam ket di met nagsarday ti
panagayus ‘ta karayan?
Ania koma no sinurotmo lattan ti lenned, kabus
ken sellag?
Saanko met ket nga immaldit dagidi darepdepta
iti kawaw a langit.
Sinurotko dagitoy kadagiti rimat dagiti
bituen, kadagiti gilap ti init
No matnag ti sikigna iti danum a masinsinit,
kadagiti agpukawpukaw
Nga apros ti bulan bayat ti panagdaliasatna
iti umatiberber nga angep.
Naggapuanna koma ti im-impek a banglo iti
pusok?
Intanemmo babaen ti arasaas a kas kalag-an ti
panagtangep
Ti langit ken taaw— saan a marukod, matinep,
masukog.
Kasano koma ngata a lipatek ti diak maaprosan?
Saanko nga inggagara ti panagrusing ti bukel—
nagsabong met lattan.
Naraniag unay dagiti matam, kinuna dagiti
makasabat kaniak,
Adda aglaslasbang a sabong iti kaunggam.
Ngem no agsarmingak, dagiti nasilap a luak ti
makitkitak.
No agbisngay ti langit iti rumabii ket
masilawan ti addangko
A mapan aguray manen iti ruangan, kuna ti
kannag kaniak:
Anian a raniag ti anninawanmo!
Diakon mabilang dagiti rabii a nagkaradap ti
bulan
Tapno bugiawenna ti sipnget ket ulsannak,
kaduaennak.
Ta ti raniag, para kadagiti agladladangit iti
sipnget.
Agyamanka kadagiti rabii a sinangsangitam
Umayen ti dimo koma maur-urayen
Silawanto ti sileng dagiti luam
Sabtento ti ayamuom ti pinetpetam nga arasaas.
--ALEGRIA ALBANO-IMPERIAL
Bacarra, Ilocos Norte
(Naipablaak iti Bannawag, Agosto 2, 2010 a
bilang.
No comments:
Post a Comment