Panagpinnakada

Sibabara pay laeng kadagiti limbang ti puted a daniw

dagiti agek nga impatayabmo kaniak iti pungto

ti aldaw a nasken a bisngayennata dagiti dua a dalan.

Daldalapadapek a kanayon

iti bibig

iti pingping

iti muging ti kada agtabon a malem,

ti kada agukrad a bannawag

ti lamuyot ken ayamuom dagidi naibislin nga agek iti pul-oy.

Adayon ti nagtengko, nalabit kas iti kaadayo met ti nagtengmo

ket no taldiapak ti lugar a nagalus-osan dagiti dakulapta

diakon maripar pay dagiti dua a nabisngay nga anniniwan

ta minawmawen ti sipnget dagiti nangalun-on

kaniak a kabakiran, inartapanen dagiti linasatko a kabatuan.

Ngem bayat ti yaaskawko ken yaaskawmo

pumigpigsa ti sul-oy ti lagip ket akuek,

umun-uneg ti kaaddam kaniak, iti abayko.

Kaaduan idi a masarakanka

iti kinalasbang dagiti sabong— sipud panagbusel

ken panagbukar; kadagiti pakabuklan dagiti bantay

a nagbestida kadagiti angep wenno kadagiti lapayagda

a nagaritos kadagiti bullalayaw.

Ipaduyakyakko kenka ita:

ti rupam

ti aminmo kaniak

awan unayen iti pangngarig a masarakan laeng

iti gagangay a kudil ti nakaparsuaan.

Ti kaipapanam, limmansaden ket naun-uneg pay

ngem iti lansad dagiti banga ti taptapuyo nga inkutukot

dagidi sikota a natapok.

Ammuem, maysaka nga ubbog

a makitinnukod iti kalindaw ti tumiktikag a kaunggak

ket kadagitoy la a mariknak, ta ti gayam panangbisngay

kadata dagiti dua a dalan, isu ti pirgis

a namagsaip iti kaipapanam.

--CORAZON F. QUIAMAS

Honolulu, Hawaii / Laoag City

(Naipablaak iti Bannawag, Oktubre 3, 2011 a bilang.)