Agduduma
ti panangrukod iti kinadagsen.
Mabalin a
gapuanan daytoy
Ti puris
iti dapan
Idi damom
ti umaddang.
Saan kadi
a ti kudil
Ti
sibibiag a pagilistaan iti piglat?
Wenno
maysa daytoy a kapuyo a tanda
Ti
nagpasaran a dagsen?
Iti
panaglabas ti tawen
Ti dagsen
iparangarang
Dagiti di
maibukirad a matam.
Manipud
iti umuna a pannakaibuyat
Ti danum
agingga iti maudi a gudugod
Ti
sepilio, nadagsen ti aglaladut
A bagim
nga umulog iti agdan.
Nadagsen
dagiti ramaymo a mangipisok
Iti
butones iti abut ti polom.
Nadagsen
ti lumamlamiis a tasa ti gatas
A dimo
pay nasimsiman.
Nadagsen
ti panaggunay ti kanito
Aglalo
ita ta agpadata nga agdardaras.
Kunam,
naudikan iti klasem.
Iti ruar
ti balay, nadagsen
Ti
panangagep ti tudo
Iti
lulonan ti payong.
Nabuntog
ti gunay
Ti
naglugananta a dyip
Nadagsen
ti ayus ti trapiko
Iti
masungad.
Kanayon a
mapampanunotko
No apay a
kasla di lumaglag-an
Dagiti
datin a bakbaklayek.
Pamrayak
a taliawenka
Ammok
pagpunganam manen
Ti
mabibbibineg nga abagak.
Iti
isasangpetta iti eskuela,
Isublik
kenka ti nadagsen a bag
A kunam a
bitbitek iti kada bigat.
Tumallikudka
a sidadaras.
Ay,
ditoyak pay laeng.
Agmaymaysa.
Masmasdaawak
Ita a
kanito, mariknak
Ti bagik,
kasla diak mabagkat.
--JAKE F.
ILAC
Lasam,
Cagayan / Valenzuela, Metro Manila
(Naipablaak iti Bannawag, Oktubre
3, 2011 a bilang.)
No comments:
Post a Comment