dika makaturog

dika makaturog kadagiti rabii.

ta di mabusalan ti sipnget
dagiti nagtagigita a karasakas…

kumali't lapayag
rippiis baddek ti musang
nga umar-arubayan
kadagiti malammin a piek.
makapaseggar dagiti taguob
a makaangot lang-es-dara
dagiti mapidutto a bangkay.
kumittab iti utek
ti ngarusngos dagiti igges
iti nayutangen a bangkag.
naringgor ti urok
ti nabsog nga alimatek.
idinto a kumarasakas
dagiti papeles ti rabii
a mangad-adal
iti yaatiddog ti sipnget.

dika makaturog kadagiti rabii,
uray pay nangwaknit ti langit.

natagari unay dagiti imbitado a bituen
iti panagpiestat' langit—

kumanabtuog dagiti panagsasala
iti entabladot' agkuykuyakoy a bulan
a sumimsimsim nalabaga nga arak…

iti sanguanan ti nakadalit a daga.

ay! makapabaringkuas dagiti batibat
a patawid kadagiti nailaksid iti paraiso
ngem iturturayan ti langit.

awan, awan, ti raniag a makita
iti entablado ti naslag a rabii.
awan, awan ti naikari a turog
iti naikeddeng a panaginana.

ket agtultuloy latta ti panagpuyat ti utek…
nasken kadi nga isawsaw ti daniw iti dara
tapno mapintaan iti nalabaga

ti nangisit latta a bannawag
ket bumtak iti lulonan nakadasay a daga
ti naisangayan, tagiuray nga agsapa
a pakairidepan dagiti idi pay a mapuypuyatan?

--NELSON G. DALIGCON

Ballesteros, Cagayan

(Naipablaak iti Bannawag, Marso 2, 2009 a bilang.)