1.
Bumegbeggang
a bato
A lumgak
iti agsapa.
Agdisso
iti daga
Dagiti
makapurar a rayana
A
mangakup
Kadagiti
agneb dagiti muyong.
Inaldaw a
sumurnad
Iti
namaris a nakaparsuaan--
In-inutenna
nga idarnap ti igaaw.
2.
Umarubayanda
iti sardam
Allingagenda
aweng ti rabii
A
parnuayen garikgik dagiti kurarapnit,
Pulikkaaw
dagiti kullaaw,
Danapeg
ti dalluyon
Nga
umayas iti dapnisan,
Anasaas
ti karayan
Ken
risiris dagiti sanga
Ti barsik
ken aplas.
Iti
baresbes, tannawaganda
Ti lubong
agingga a sumngay ti bannawag.
3.
Sumagawisiw
a sumungad
Iti
sinanama a deppaar
Mangilagud
bang-i ti kalgaw,
Ken iti
ayamuom ti nepnep
Iti
naulimek a paraangan.
4.
Agallangogan
a dulluog
Ti
makibor a barukong
Wenno
aligagaw a naisaad laem ti daga
A maitupa
iti langit:
Naipaurnos
umap-apuy a barut
Nga
agkayammet iti tangatang
Danggayanna
garakgak ti gurruod.
5.
Maiburnok
a pungtot
A
naipaluom iti kaunggan
No
agpabus-oy nalitem nga ulep
Nga
agindurog iti tangkig ken patag
Mangellep
iti tapok
Ken
mangugas lati ti daga.
--RONNIE
ES. AGUINALDO
Sta.
Teresita, Cagayan / Camiguin Island
(Naipablaak iti Bannawag, Agosto
16, 2010. Immuna a naipaskil iti basirepubic.blogspot.com. Naadaw ti imahen
manipud iti ala a ladawan ni R.V.Aragon iti Aragao, Sta. Teresita, Cagayan.)
No comments:
Post a Comment