Kumurikor iti lapayag
ti sagawisiw ti angin a nangipanalbaag
iti bulong ti ridaw ken tawa
ti kalapaw a nakaplengak
a kas met la idi ipanalbaagmo
ti ridaw ti pusok idi panawannak;
intayabna dagiti bulbulong,
dagiti sumagmamano a bubong
naspak dagiti sanga
ti nabatbati pay nga arapaap.
Addanto pay ngata panaglinak?
Nagnadnad ti allawig
indalimanekko
dagiti agkaiwara a bulbulong
dagiti naspak a sanga
uray ti nadalupo nga alad.
Ita, nasirnaaten ti riknak.
Timmangwa ti init ket nakitaka
a sumungsungad iti daya.
--ROLANDO U. SEGURO, JR.
Allacapan, Cagayan
(Naipablaak iti Bannawag, Septeimbre 3, 2012 a
bilang.)
No comments:
Post a Comment