2 a Salip iti Literatura a Para Ubbing

Ipakaammo ti GUMIL Ilocos Norte (Gunglo Dagiti Mannurat nga Ilokano iti Ilocos Norte) kadagiti amin a mannurat iti Ilokano a naluktanen ti Salip iti Panagsurat iti Daniw a Para Ubbing ken Salip iti Sarita a Naidaniw a Para Ubbing (Sarindaniw).

Pagbuligan daytoy ti GUMIL Ilocos Norte nga ipanguluan ni Mrs. Elizabeth Madarang-Raquel ken ti DepED-Ilocos Norte Division iti panangidaulo ni Dr. Cecilia Pacis Aribuabo, superintendente, ken esponsoran da Engr. Ric Agnes, Ms. Gladys Menor ken ti GUMIL Oahu (Gunglo Dagiti Mannurat nga Ilokano iti Oahu) nga ipanguluan ni Mr. Rizal Fernandez.

Panggep daytoy a pasalip ti mangbukibok iti maysa kadagiti di unay naikaskaso a tay-ak ti Literatura Ilokana, ti literatura a para ubbing.

Babaen dagitoy a pasalip, manamnama a magun-od dagiti sumaganad:

1. Makaipaay iti insentibo ken paratignay dagiti mannurat nga Ilokano tapno agsuratda iti daniw ken sarita a para ubbing.

2. Pammigbig kadagiti gapuanan a maidatag nga addaan iti merito;

3. Agserbi a kas pagtaudan dagiti gapuanan a mabalin a maiserbi para iti programa ti Departamento ti Edukasion, ti MTB-MLE.

Dagiti alagaden dagiti pasalip:

*     *     *

Para iti Salip iti Daniw a Para Ubbing

1. Silulukat ti salip kadagiti amin a mannurat iti Ilokano, malaksid kadagiti opisial ti GUMIL Ilocos Norte ken kadagiti kameng ti DepEd-Division of Ilocos Norte Promotional Staff.

2. Dua a paset ti isalip. Umuna a Paset ti buklen ti 5 a daniw a para iti kindergarten ken Grade 1. Sagtunggal maysa kadagitoy a lima a daniw, addaan laeng iti 4 a linia nga agpapada ti bilang ti ebkasna (syllable) ken agririma kas koma iti kastoy:

       Immay layus iti Lading

       Nayanud baka ken kalding

       Kuna ni lilok a Puding

       Kalbo kanon Bantay Bulding

3. Maikadua a Paset ti daniw a para iti Grade 2 ken Grade 3. Buklen daytoy ti 5 a daniw a sagtunggal maysa kadagitoy, addaan iti 12 a binatog.

4. Nawaya ti mannurat nga agpili iti tema ken topiko dagiti daniwna ngem masapul a maibagay iti edad dagiti ubbing a nadakamat.

5. Nasken a maawat ti Sekretariat ti Pasalip dagiti maisalip iti di naladladaw ngem iti alas singko iti malem ti Nobiembre 30, 2012.

6. Mayawatto dagiti premio dagiti mangabak iti GUMIL Ilocos Norte Convention iti Doña Josefa Edralin Marcos Elementary School, Currimao, Ilocos Norte inton Disiembre 22, 2012.

7. Dagiti premio: Umuna a Gunggona, Php 5,000.00 ken sertipiko; Maikadua a Gunggona, 4,000.00 ken sertipiko; Maikatlo a Gunggona, 3,000.00 ken sertipiko ken 3 pay a Pammigbig a Pammadayaw a maikkan iti sag-1000.00 ken sertipiko.

8. Saan a mabalbaliwan ti pangngeddeng dagiti hurado malaksid no mapaneknekan a saan a putar ti autor ti impangabakna.

9. Pakuyogan ti pakisalip iti ababa a pakasaritaan ti biag ti autor ken 2”x 2” ID a ladawan. Nasken nga ited ti numero ti selpon ken/wenno e-mail address.

10. Iturong ti pakisalip iti The Secretariat, Salip ti Daniw a Para Ubbing, DepEd, Division of Ilocos Norte, Giron St., Laoag City.

*     *     *

Para iti Sarita a Naidaniw a Para Ubbing

1. Silulukat ti salip kadagiti amin a mannurat iti Ilokano, malaksid kadagiti opisial ti GUMIL Ilocos Norte ken dagiti kameng ti DepEd-Division of Ilocos Norte Promotional Staff.

2. Maysa a sarita a para ubbing iti porma a naidaniw ti isalip. Addaan daytoy iti 32 a quatrain (uppat a binnatog) ket ngarud aganay iti 128 a linia. Addaan met iti rima ken rukod.

3. Nawaya ti mannurat nga agpili iti tema ken topikona ngem masapul a maibagay iti edad dagiti ubbing nga agtawen iti 6-9.

4. Nasken a maawat ti Sekretariat ti Pasalip dagiti maisalip iti di naladladaw ngem iti alas singko iti malem ti Nobiembre 30, 2012.

5. Mayawatto dagiti premio dagiti mangabak iti GUMIL Ilocos Norte Convention iti Donia Josefa Edralin Marcos Elementary School, Currimao, Ilocos Norte inton Disiembre 22, 2012.

6. Dagiti premio: Umuna a Gunggona, Php 5,000.00 ken sertipiko; Maikadua a Gunggona, 4,000.00 ken sertipiko,; Maikatlo a Gunggona, 3,000.00 ken sertipiko ken 3 pay a Pammigbig a Pammadayaw a maikkan iti sag-1000.00 ken sertipiko.

7. Saan a mabalbaliwan ti pangngeddeng dagiti hurado malaksid no mapaneknekan a saan a putar ti autor ti impangabakna.

8 Pakuyogan ti pakisalip iti ababa a pakasaritaan ti biag ti autor ken 2”x” ID a ladawan. Nasken nga ited ti numero ti selpon ken/wenno email address.

9. Iturong ti pakisalip iti The Secretariat, Salip ti Sarita a Naidaniw a Para Ubbing, DepEd, Division of Ilocos Norte, Giron St., Laoag City.

(Naipablaak iti Bannawag, Oktubre 29, 2012 a bilang.)