Ganggannaet

Kayumanggi ti maris ti kudilko

Ngem apay a saan a puraw la koma

Kas kadagiti adda iti ballasiw ti taaw?

Kayumanggi a kayarig

Ti bingkol iti bangkag

A nabayag a saan a nakaraman

Iti imas

Iti dakulap

Ti lamiis ken ayat

Ti tudo a naggapu sadi langit?

Nayanakak iti ili nga adda iti nagbaetan

Dagiti pinagayan, bangkag, kataltalonan

Nakitak ti rigat nga inyeg

Dagiti tudtudo ti bagyo

Ket dagiti pagay saandan a timmangad.

Pimmanawanak iti ili a nakayanakak

Pinanawak ti kayumanggi a daga

A kayarig ‘toy kudilko. Pimmanawak.

Panawen ti panagadal ken panangimula

Iti pannakaammo; panangtakuat

Iti sirib ken saririt— pamigsa

A sumango iti biag.

Kabayatanna…

Panawen met ti pananglipat

Kadagiti awan kaes-eskanna a bambanag.

Ti dakulapko

Dagiti saksakak

Saanen nga’gpaay iti pitak, arado ken tambak.

Nailanad iti kompiuter nga iggemko ti kinaasinok

Saanen a makabalikas ‘toy dilak

Iti daan a pagsasao dagiti kakailiak

Kailian? Siasino ti kailiak?

Ditoy tengnga ti siudad, dagiti kakaarrubak

Addaan lubong a kukuada laeng

Kasdiayak met.

Adda met lubong a kukuak laeng.

Dagiti kakailiak

Napukawen iti naunday a panawen

A panagtalinaedko ditoy adayo.

Ballasiw dagiti bambantay.

Ballasiw ti Magat

Ballasiw ti Dalton

Simmalogak

Adayon ti napnapanak

            Adayon ti nadanonko.

Ti kudilko napudawen.

            Napno iti kamanaw.

--MIGHTY C. RASING

San Manuel, Isabela / Project 8, Quezon City

(Naipablaak iti Bannawag, Marso 10, 2008 a bilang.)