Panagilista

(ken ni Isaias Dave)

tiliwtiliwem dagiti atap a balikas

beddabeddal a kas kadagiti apagtubo

aglulumba nga urnos dagiti ngipenmo.

ammomon nga uyosen dagiti garakgak

tunggal mapagustuanka a makiinnangaw

naynay nga ilislistak dagitoy iti kuadernom

ket no kastan a kairut ti tuturogam

ukagek dagitoy a pinanid— sublisubliak

kas man pangyaw-awan kadagiti kettang

ti awan pugsat a kuerdas ti panagaw-awir

kas man pangnayon kadagiti sutil a sennaay

ti awanan ngudo a siglotek a linas ti anus.

tiliwtiliwem dagiti atap nga addang

dagiti sursuruem a karit ti lubong

saggaysa ken sibubuteng a pagna

in-inut a kas iti panaguddog ti segundo ti pagorasan

maimaldit iti nakemmo dagiti sugat ken piglat

ket tumakderka a mangtiliw pay iti askaw

ta ditoy ti pangrugian dagiti sangalem a daniw

nga iti kuadernom, naynay nga ilislistak.

--DANIEL L. NESPEROS

San Nicolas, Ilocos Norte

(Naipablaak iti Bannawag, Hulio 16, 2012 a bilang.)