Imbilinmo
a riingenkanto no agrubuatak
Ngem diakto aramiden dayta;
siuulimekakto a pumanaw,
Kas iti managbabain a pul-oy
nga umaplaw,
Agtil-ay amangan no malukagka
pay.
Dikanto riingen ta maamakak,
nga igawidnak
ket malunagto ‘toy riknak,
Panawankan tapno sumardengen
a pagpambarmo
ni panangipateg a pangkeltayam wayawaya,
ket mulitam ti kaipapanan ni ayat.
Tinarigagayak nga ayatenka,
awan gapuna no di gapu ta ay-ayatenka,
awanan panagimbubukod, siwawayawaya.
Ngem
dimo gayam kabaelan ti pudno a panangipateg
Sinubadam panagayatko iti di agsardeng
nga an-anek-ek.
Wen,
panawanka ket dikanto riingen inton agrubuatak
Maamakak iti panangigawidmo
ket kunaem,
“Maysa kadi pay, a, nga oras; maysa pay a
malem.”
Diak ammon ti agsangit, ti
pusok nabibinegen.
Ngem maaliawak amangan no iti
panangigawidmo
ket agbitek manen ni ayat ditoy puso
a masubadanto met laeng iti ranggas.
Apay a riingenka?
Tapno denggek ti pakaasim ket
kunaem nga ay-ayatennak?
Ket gapu ta ipatpategnak,
kasapulan a saktannak?
Ti kadi sam-it ni panagayat
mananam
babaen ti makapasugkar a kinapait?
Ammok a “wen” ti sungbatmo
ket ay-aywennakto manen.
Saan, saan, dikanto riingen…
--CLAIRE A. SUMAHIT
(Naipablaak iti Bannawag, Mayo 12, 2008 a bilang.)
No comments:
Post a Comment