10.12.2012

2 a Soneto





1
adda irut kalipkip 'toy lagip
kaniak, irut a mangiruangan 'diay
pagraratunuanda nga aglanlantip
bituen rabrabii ken bambantay.

sadiay adda umanges a riknak
no 'ti tamtambak 'diay taltalonko
pug-awannak barissanga nga innak
labsan, umarasaas mugingko.

anian sayaatna koma no 'tay
pagas-askawak 'toy siudad napno't
ruruot, mangriing, mangmurmuray --
ragsak 'toy bukodko, awan biddut.

irut lagipko 'toy innak sabten,
ep-ep 'toy iliwko no 'sut sumken.

2
no 'toy lagip awanen 'tay inna
maiparipirip, agkudaapak,
napukawkon kararuak, kadkaduak,
naglibasen kaniak 'tay liwliwa.
iti lagipko nakasagupit
adu nga agas 'ti kalgaw, nepnep,
isuda dagitay mangted ep-ep
iti saem gapuanan 'tay saplit.

gapuna a kanayon nga innak
an-annadan daytoy lagip, isu
a tubong 'toy nabisked a rikna,
kinelleng pay adu a ragragsak.
isu ti sadag 'toy panunotko,
isut' bubon namnamak ken pigsa.

--HONOR BLANCO CABIE
Pinili, Ilocos Norte / Cainta, Rizal


(Naipablaak iti Bannawag, Abril 30, 2012 a bilang.)

1 comment: