"Life
begins at forty..."
-- maysa a pagsasao
Oktubre
manen a mangipalagip iti arinunos ti tawen.
Oktubre
ti lagip iti kuarentan nga Oktubre a lumabes.
Ket
Oktubre a kangitingit ti gawat, kapades ti saraaw,
Kabayatan
a dandaniwam ti binulan a patriarkal a laglagip
Ken
sentimental nga ay-ayat, iti panawen ti sagubanit,
Tiempo
a detenido ti bagas ket arestado dagiti tig-ab.
An-anuem
ngarud daytoy nga Oktubre ti kasangay?
Dimon
kayat a daniwan dagiti retirado a rugso.
Dimon
daniwan dagiti sepia a retrato ti ubing a tibbayo.
Selebraram
daytoy nga aldaw nga agsukdalka iti arep-ep
Ti
kawaw a latat' pagbagasan, a naynay la nga agdayamudom
No
daytay ikiraudmo ti teppeng iti dimket a pegpeg iti lansad.
Aldawmo
ita, bulanmo ita nga al-aldaw met ti atitiddog a pila
Ken
agsasanga a libut dagiti umar-araraw a dila ken dawatdawat.
Inaldaw
a panagsarimutmot iti nabatbati a gawed.
Panagarinsawad
iti natda a bua iti nalungtot a burnay.
Panaglebbek
iti nagsultopan iti kuttongi a leddangan.
Panagkupin
iti rigrigis a madubla. Tapno adda latta mapadara.
Agmamaka
lattan, imuskadam ti dawat
Iti
labon ti aldaw: yaw-awan ti sugpet ken pait ken adat
Dayta
sikal ken sikaw. Lebbekem 'ta kiraos. Ngalngalem
Ket
ngalngalem 'ta garadugod. Ipugtitmo 'ta bisin, palabbagaem
Dagiti
kalsada ken paraangan: itinam ti daradara a pedped
Iti
aglulusiaw nga Oktubre. Oktubre a sepsepsepan ti bisaleg.
Ay,
dimon daniwan ngem daniwam latta ti ayat iti panawen
Ti
ringgor, ti rugso iti panawen ti panagkanagan dagiti piglat.
Daniwam
daytoy nga aldaw a makiliblibutka ita iti pagbiag.
Daniwam
daytoy nga Oktubre a rugi ti pannakipila iti biag.
--ROY ARAGON
Dupax
del Norte, Nueva Vizcaya / Iguig, Cagayan
(Naipablaak
iti Bannawag, Oktubre 27, 2008 a bilang.)
No comments:
Post a Comment