Ammok a matektekanka
Ngem ammom kadi nga uray siak
Binungonnak ti segga?
Saan laeng a sika ti agpanggep
A mangrenren iti panawen:
Ti mangpugsat iti nagbaetan
Ti ditoy ken sadiay;
Ti ita ken inton madamdama…
Segseggaak met ti alimpatok ti samiweng
A pinutar dagiti nagtugmok a perreng
Kas met kenka nga agpanggep nga agampayag
Ti essem iti lansad ‘toy barukong
A namin-anon a pinawilan ti panawen
Ur-urayek, dungngo, a sumangbay
Ti kunkunam nga aligagaw
Kas met iti panangur-uraymo
Iti makatektek nga aliaw
Ngem bay-anta man uray
Iti apagapaman laeng
Sumuknor met iti kaungganta
Ti bara a yeg ti arbis
A mangsebseb iti bumegbeggang
Ngem naruka nga ayan-ayatta.
--REYNALDO E. ANDRES
Batac, Ilocos Norte
(Naipablaak iti Bannawag, Agosto 20, 2012 a
bilang.)
No comments:
Post a Comment