makitak uray no
nasipnget ti aglawlaw
dagiti naiwara a bato
a pasaray mabaddekak
naladawak ngem saan a
dagitoy ti makalapped
adda naikari a diak
ammo no sadino ti ayanna
ditoy ken dita wenno
adayo pay nga ungto
daytoy a dalan a
mangibagbaga nga addaka dita
diak ammo no masurotak
ti pagnaak
ta naremmeng a kasla
awanen ti lumaslasat
isu a napukawen dagiti
lemma dagiti dapan
awanen ti pagilasinan
nga adda nagna a karison
wenno ulnas ket
yadadayom no maranaak
ti agud-uddog ken
aglatolagto nga apuy
nga aggapu iti rimmuok
dagiti kawayan
ngem ti tarigagay
iduronnak latta a sumrek
uray man no isu ti
pakadalebak
susuonko dagiti diak
maibbatan a darepdep
sayang laeng no diak
maibanag nagkaysa a panggep
naladaw a panagkuti
ngem ammok a di pay nagrikep
ti ridawmo ket kayatko
nga awan ti maysa kadakayo
ti madalapusko ta ti
initko a naraniag isut’ kalasagko
baliksekto manen
dagiti nalpaskon a naibalikas
a rantak nga isab-it
dita sumsumga a barukongmo
ngem apay a kastoy
metten ti langa ‘toy gungugong
adu ti bangen ket diak
sa masarkedan ida
adda timek a diak ammo
no sadino ti paggapuanna
adda pay dagiti
ragutok dagiti ayup wenno aniada ditan
a ngem awan ti sumga
kaniak a panagbuteng
naamitanak man ti
sipnget ammok nga addaka
iti ridaw a
mangpaspasungad idadatengko
mariknamto ti
kapigsa’t rissuod ‘toy ayat a bilegmo.
--ELIZABETH MADARANG
RAQUEL
Currimao, Ilocos Norte
(Naipablaak iti
Bannawag, Abril 2, 2012 a bilang.)
No comments:
Post a Comment