Ta Diak Kayat a Dagulliten

(ken ni Ading Aneng a taga-Adams)

no koma lunagennak ti darang ti init,

tapno maipilkatak laengen iti rengngat,

ket makimaymaysaak kadagiti ramen ti daga,

ta uray ti lagipko maipalunapinto lattan

kadagiti ramut ti dalukdok ken barsanga.  

wenno saan, ikuyognak dagiti marsaak

a sabong ti kawkawati a mayaplag iti kalsada—

malidlidan, mapaddapaddakan agingga

a mapitpit ti barukong ket mapespes

ti nagbalay a napait, nagpanes a dara.

kunak manen, maysaak koma kadagiti

mapag-ut a marapagay a maikuribot

ket maisarangusong iti agkatkatay

a ngiwat ti nuang, ta iruamko ti bagik

iti sakit ti ngatingat dagiti nainayad,

agpalaud nga askaw.

no saan, maysaak koma a naakas a niniogan—

nagrarangasan ‘tay bulsek, pilay a di-katatawan,

maikurkor kadagiti agkukurrot nga upa

ken iti nainggasatan a karurayan—

maidaton nga anib ken salaknib

iti agpiskel a rangtay.

siak koma gayam ‘tay pungdol

a maisungrod iti dalikan, agingga a mapasagak

iti gil-ayab ta bareng gumubang ti kimmigpal

a leddaang iti likud ti naparpar a paragpag.

ta ti asuk, agbalinto nga insenso a manglukag

iti nakipet a bibig ti agbibineg a puso.

mayatak met, no maysaak a natikagan

a karayan, ket makirriit ti naay-ay, naay-ayam

ken nabaybay-an a pakaasi ket agbalin

a pakaitabonan amin a nalaes ken awanan

anges a babawi. (agrennekak kadagiti mayatang

a pakawan, nagulgolan iti daradara nga arutang.)

ta diak kayat a dagulliten, nga iti panagmaymaysak

naglati ti siitan a singsing a nayuper iti lua.

ket naet-etan ti karabukobko iti pugsat a kuentas

agingga a ti timekko, in-inut nga alun-onen

nakaal-alingget nga anug-og

ken makaaliaw a riaw.

--ROMEL A. PASCUA

Bacarra, Ilocos Norte

(Naipablaak iti Bannawag, Mayo 28, 2012 a bilang.)