1. Lemma iti Papel
(para ken ni AJ)
napatak ti pannakaikur-it dagiti lemma iti
papel
ta naibinggas ti pakasaritaan kadagiti kurbada
a lasaten ti nangisit a tinta
kasinginda ti alimbasag iti tunggal panagtuglep
tapno tuldekanna ti parapo ti tawen.
kas nakunak kenka saan nga umulog
dagiti bituen iti sanguanam tapno pidutem,
ken awan ti agdan ti langit nga uliem
ngem addaan iti ridaw
kadagiti makasukisok
tapno ti plumam ikur-itmo met.
2. Babato ti Sagumaymay
maregreg ti babato ti sagumaymay
iti malem nga agtutuglep ti daya
dennesenna ti agalingasaw a gurigor
ti mail-ila a barukong ti kapanagan
maigampor daytoy nga agtoktok iti lulonan
ti kimraang a sayugan,
ket sadiay agpaanud a kas mutia
nga igupen ni kalantangan.
3. Pasintawi
iti
tengnga, naipasdek ti pagarianna
sipapannakkel
a mangwanwanawan dagiti matana
“daytoy ti pagariak,
daytoy a daga ti nakaiparukpokan
ti dara ken anges ti pagiliak
bantayak iti amin a gundaway."
manipud
iti abagatan, iti abagana nagdisso ti puraw a pagaw
ket
dagiti takiagna inna intag-ay.
--JAKE F. ILAC
Lasam, Cagayan / Valenzuela City
(Naipablaak iti Bannawag, Mayo 7, 2012 a
bilang.)
No comments:
Post a Comment