No maminsan,
idawdawattayo
a tungpal-biag koman ti apagapaman
ngem di latta agpabus-oy ti panawen:
dagiti agsapa agbalin a batibat
awanan isem ken parabur.
Agbalin ti sardam nga agnanayon a panagarapaap
kadagiti nabtak nga arep-ep ken kalikagum.
Agraas ti parbangon iti pettat a ragsak.
dagiti malipatan a rikna, agbalinen a dapo
maikay-ab iti ngatuen dagiti bannatiran ken
anghel.
Kabus manen ti bulan ken agrimrimat dagiti
bituen;
ket makitkitak ida nga amarilio a mata nga ita
laeng a tagipatgek
Anansata agkasapulan unayen iti solitario a
ragsak
kas iti droga para iti pettat a pannakapnek;
iti pannakaamiris nga
iti ayat ken iti biag,
masapul nga agsardeng sakbay
a tumpuak iti bubon dagiti di maliklikan a
kinapudno.
Nga iti ayat ken iti biag,
masapul nga agsarimadeng—
maysa nga apagbiit a panagsardeng
sakbay ti pudpudno a panangsango kadagiti
karit;
sakbay ti panangatiw kadagiti anniniwan ti
kinapannakkel,
makaidasay a panagbuteng, iti karuay
ti panangaklon ken panangimano.
--ROSALIE V. CALPITO
Camiling, Tarlac
(Naipablaak iti Bannawag, Marso 26, 2012 a
bilang.)
No comments:
Post a Comment