Dawel

Nadawel itan dagiti agbangon a dalluyon

Ngem maiwayat latta ti kitang wenno ti iket

A mangtiliw kadagiti nabatbati pay a billangan, bilis—

Sungbat iti inaldaw a kiraos, iti inaldaw a gawat

Iti inaldaw a panagkasapulan— ta rumbeng a silpuan

Ti anges tapno mayaddang ti biag, ti pagtaengan

A siblosiblokan ti ima ti danum tunggal atab.

Saan laeng nga iti taaw daytoy a dawel

Tumaktakdang iti kadaratan, sumangsang-at

Kadagiti pantok— in-inut nga aguyas iti paraangan

Ta nabileg dagiti makina nga agkurob, agsusop

Iti nayon pay a nam-ay dagiti agul-ules iti nam-ay

Ken mabati latta dagiti kitang ken iket a magsat, mabsang

A mangpakaro iti daytoy a kiraos, iti daytoy a gawat

Ket bumangon latta ti aligagaw iti barukong

A siblosiblokan ti ima ti danum tunggal atab.

Adda met pannakaibubo dagiti babassit a timek

Tapno tuminggaw, danonenda dagiti nakatangep,

A tawa ken ridaw; sabali laeng dagiti naikari, naitapik,

A pannakikadua, a pannaranay: marikna ti ikikired, isasanikar

A dumupar iti pader. Ngem nasalemsem gayam dagiti dakulap

Ket matda latta dagiti naiwayat a masakbayan

A siblosiblokan ti ima ti danum tunggal atab.

--JOBERT M. PACNIS

Ballesteros, Cagayan

(Naipablaak iti Bannawag, Oktubre 8, 2012 a bilang.)