Unnoy

Agunnoyak kenka

Kas nakaparintumeng a kurimatmat

Ti bulan; ilukatmo ‘ta barukong

Ket silnagak nakatalimeng

A kaunggam.

Dimo ikumot ti nalamiis

A riknam-- perrengennak,

Alawem dagiti kumarkarais a ramay

Iti rangkis lumlumseb a matak.

Ta sika ti bukodko a lawag

A makiinnartap raniag

Kadagiti bituen a purpurarem

Iti dayag.

Ta sika, wen,

Ti sangakopita a linnaaw

A maibukbok

Iti muging ti kada umay

Agbuniag iti ayat.

--CORAZON F. QUIAMAS

Ewa Beach, Hawaii / Laoag City

(Immuna a naipaskil iti www.penshadow.wordpress.com; www.urattipluma.blogspot.com; ken www.iluko.com, Nobiembre 20, 2008; nabulod ti imahen iti http://apod.nasa.gov. Naadaw iti basirepublic.blogspot.com. Naipablaak iti Bannawag.)